Կոռուպցիայի դեմ պայքարի եռաչափ խաղ` թումոցիների կողմից

Մինչ Հայաստանի Հանրապետության կառավարությունը տարիներ շարունակ կոռուպցիայի դեմ պայքարի ծրագրեր է փորձում մշակել, ընդամենը մեկ տարում, «Թումո» ստեղծարար տեխնոլոգիաների կենտրոնի երեխաների մի թիմ ստեղծել է հակակոռուպցիոն եռաչափ ուսուցողական խաղ՝ «Նետոյի առասպելը», ինչպես նաև ինտերակտիվ վեբ-կոմիքս, որտեղ ավելի ծավալուն ներկայացված է ընդհանուր խաղի պատմությունը, կերպարների նկարագրությունը:

Խաղը և կոմիքսը ստեղծելու միտքը ծնվել է «Թումո»-ի և Եվրամիության համատեղ համագործակցությունից: Թեման ուսումնասիրվել է մասնագետների կողմից, թիմի համար անցկացվել սեմինարներ: Խաղը ստեղծողները հասկացել են՝ կոռուպցիան միայն կաշառք տալը չէ: Բոլոր դեպքերը ներառված են խաղում: Այստեղ հաշվի են առնվել ինչպես Հայաստանում տեղի ունեցող կոռուպցիոն դեպքերն ու դեմքերը, այնպես էլ ամբողջ աշխարհի:

Խաղը նախատեսված է 10-21 տարեկանների համար: Այն ստեղծողները կարծում են՝ կերպարների և վիրտուալ աշխարհի տարօրինակությունը շատերի համար գրավիչ կլինի: Խաղերն այնպես են կառուցված, որ խաղացողը հասկանա՝ անարդարությունների հետ գործ ունի: Ի դեպ, խաղը ստեղծողները վերջերս Գերմանիայից հաղթանակով են վերադարձել:

Հակակոռուպցիոն այս խաղը լավագույն ստեղծարար նորարարություն ճանաչվեց եվրոպական Nice Awards մրցույթում՝ հայտնվելով 100-ից ավելի դիմորդներից ընտրված լավագույն հնգյակում: Իսկ խաղի շնորհանդեսը կլինի դեկտեմբերի 9-ին՝ կոռուպցիայի դեմ պայքարի միջազգային օրը:

Մանրամասները՝ տեսանյությում

Մարինե Խաչատրյան