01.07.2026 | 02:54
ԱԱ-2026. Ֆրանսիան խնդիրներ չունեցավ, Մբապեի դուբլը. ՏԵՍԱՆՅՈՒԹ
«ԱրմԹեք’17»-ում կքննարկվեն կիբերանվտանգության հիմնախնդիրները
15.09.2017 | 17:24
Սեպտեմբերի 27-ին կկայանա բարձր տեխնոլոգիաների ոլորտի 10-րդ`«ԱրմԹեք 2017» ամենամյա գործարար համաժողովը: Այս մասին ՀՀ տրանսպորտի, կապի և տեղեկատվական տեխնոլոգիաների նախարարությունում կայացած մամուլի ասուլիսին հայտնեց նախարար Վահան Մարտիրոսյանը:
«Նախատեսվում է, որ «ԱրմԹեք’17»-ը կունենա ավելի քան 200 մասնակից` բարձր տեխնոլոգիաների ոլորտի համաշխարհային ճանաչում ունեցող ընկերությունների ղեկավարներ, հեղինակավոր համալսարանների ու գիտական կենտրոնների ներկայացուցիչներ, ոլորտը ներկայացնող միջազգային կազմակերպությունների տնօրեններ Ռուսաստանից, ԱՄՆ-ից ու Եվրոպայի տարբեր երկրներից»,- ասաց նախարար Վահան Մարտիրոսյանը:
ՀՀ վարչապետի բարձր հովանու ներքո անցկացվող «ԱրմԹեք» համաժողովը նպատակ ունի աջակցելու Հայաստանի բարձր տեխնոլոգիաների ոլորտի զարգացմանը՝ խթանելով միջազգային գործարար կապերի ամրապնդումը և ներդրումների աճը:
Առաջին «ԱրմԹեք»-ը տեղի է ունեցել 2007թ.-ին Սան Ֆրանցիսկոյում (ԱՄՆ), որից հետո համաժողովը ամեն տարի հաջորդաբար տեղի է ունենում Հայաստանում և Միացյալ Նահանգներում։
«Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը ներկայացրեց համաժողովի օրակարգի հիմնական ուղղությունները. կիբերանվտանգություն, այս ոլորտում տարբեր երկրների կիրառած փորձը, կիբերանվտանգության մասնագետների արդի խնդիրներն ու մարտահրավերները, կիբեր սպառնալիքներն ու պաշտպանվելու հնարավորությունները՝ մասնավոր և հանրային հատվածում։
«Ինչքան բարձր տեխնոլոգիաները զարգանում են, այնքան կիբերանվտանգության խնդիրը ավելի ու ավելի է արդիական դառնում: Մենք այս թեման քննարկելու ենք, ոչ թե որովհետև հայկական ինտերնետի վրա կիբերհարձակումները շատ են, այլ որովհետև այս թեմայով փորձ և ասելիք ունենք»,- նշեց Բագրատ Ենգիբարյանը:
Համաժողովը նաև բացառիկ հնարավորություն է ներկայացնելու հայաստանյան բարձր տեխնոլոգիաների ոլորտը միջազգային տեխնոլոգիական համայնքին, և համաշխարհային մակարդակով բարձրացնելու Հայաստանի` որպես աշխարհում առավել արագ զարգացող ՏՏ ոլորտ ունեցող երկրի վարկանիշը:
«Սինոփսիս Արմենիա» ընկերության գործադիր տնօրեն Հովիկ Մուսայելյանը հիշեց, որ երբ 2007-ին առաջին «ԱրմԹեք»-ը պիտի անցկացվեր, շատ հավակնոտ էր հնչում երկու տարին մեկ այս համաժողովը ԱՄՆ-ում` Սիլիկոնային հովտում անցկացնելը: «Սակայն 10 տարվա փորձը հաշվի առնելով` պիտի ուրախությամբ արձանագրենք, որ այս համաժողովը տեխնոլոգիական միջազգային հանրությանն ամեն տարի ասելիք ունենում է»,- հավելեց Հովիկ Մուսայելյանը:
Նախարար Վահան Մարտիրոսյանը, լրագրողների հարցին ի պատասխան, հայտնեց, որ Հայաստանի Կիբերանվտանգության ռազմավարությունն արդեն պատրաստ է, շուտով կներկայացվի Անվտանգության խորհրդի քննարկմանն ու կհրապարակվի:
Բագրատ Ենգիբարյանը նշեց, որ վերջին տվյալներով Հայաստանում ՏՏ ոլորտի ընկերությունների թիվը հասել է 500-ի, որոնց տարեկան շրջանառությունը անցնում է 6 միլիոն ԱՄՆ դոլարի շեմը, ինչը Հայաստանի համար աննախադեպ ցուցանիշ է:
Այս ոլորտում զբաղված է 15.000 մասնագետ: Նախարարի խոսքով աշխատատեղերը շարունակում են կայուն աճ ապրել` տարեկան 10 տոկոսով: Իսկ ՏՏ ոլորտի տնտեսական աճը վերջին տարվա ընթացքում հասել է գրեթե 35 տոկոսի:
Հայաստանյան ՏՏ ոլորտը նաև որակական աճ է ապրում` աշխարհին ներկայանալով ոչ թե ու ոչ միայն էժան աշխատուժով, այլև տեխնոլոգիական լուծումներով: Առաջիկա տարիների համար ոլորտի նոր ռազմավարության առանցքային կետերից է լինելու ոչ միայն հայ մասնագետների արտահոսքի նվազեցումն, այլև օտարերկրյա մասնագետների հոսքը Հայաստանում գործող ՏՏ ընկերություններ:
