Նախագահականում խուսափում են համաներման հարցից

Factor.am-ը գրավոր հարցմամբ դիմել էր ՀՀ նախագահ Սերժ Սարգսյանի մամուլի քարտուղար Վլադիմիր Հակոբյանին՝ խնդրելով հստակեցնել, թե արդյոք ՀՀ անկախության 26-ամյակի առիթով հնարավոր է նախագահի կողմից համաներում հայտարարվի։ Նախագահի մամուլի քարտուղարը, սակայն, հարցման պատասխանում ներկայացրել էր միայն համաներում հայտարարելու ընթացակարգը:

«Համաներում հայտարարում է Ազգայի Ժողովը՝ հանրապետության նախագահի առաջարկությամբ։ ՀՀ նախագահի առաջարկությունը Ազգային Ժողովին ներկայացնելու մասին հանրությունը տեղեկանում է ԱԺ կանոնակարգով սահմանված կարգով»,- ասված է Վլադիմիր Հակոբյանի կողմից ուղարկված պատասխանում։

Այս պատասխանը ստանալուց հետո կրկին գրավոր հարցմամբ դիմեցինք Վլադիմիր Հակոբյանին՝ խնդրելով հստակեցնել, թե արդյոք Հայաստանի անկախության 26-ամյակի առիթով նախագահը համաներման առաջարկություն ներկայացնելո՞ւ է խորհրդարան, և եթե այո՝ Քրեական օրենսգրքով դատապարտված մինչև քանի՞ տարվա ազատազրկում նախատեսող արարքներ կատարած անձանց վրա այն կարող է տարածվել։ Այսօր, սակայն, նախագահի խոսնակից պատասխան ստացանք, որ «թեմայի հետ կապված այլ ասելիք չունի»:

«Նախորդ հարցման պատասխանում իմ կողմից պարզաբանվել է համաներման հետ կապված հարցը և այդ թեմայի շուրջ այլ ասելիք չունենք։ Խնդրում եմ որպես այս հարցման պատասխան դիտարկել ձեզ ուղարկված նախորդ հարցման պատասխանը»,- ասված է Հակոբյանի պատասխանում:

ԱԺ Պետաիրավական հարցերի մշտական հանձնաժողովի նախագահ Հրայր Թովմասյանից հետաքրքրվեցինք, թե արդյոք նախագահի կողմից համաներման առաջարկություն ներկայացվե՞լ է խորհրդարան, ինչին Թովմասյանը պատասխանեց․ «Իմ ունեցած տեղեկություններով` ոչ»: Ապա հավելեց, թե տեղյակ չէ այդ մասին։

Հիշեցնենք, որ դեռ նախորդ տարի` անկախության 25-ամյակի առիթով կրկին ակտիվացել էին համաներում հայտարարելու մասին խոսակցություններն ու մամուլի հրապարակումները, սակայն սպասված համաներումն այդպես էլ իրականություն չդարձավ: Հայաստանում վերջին անգամ համաներում հայտարարվել է 2013 թվականին՝ անկախության 22-րդ տարեդարձի կապակցությամբ։ Հանրապետության նախագահի կողմից սովորաբար համաներում հայտարարվում է պետական տոների ժամանակ՝ որպես մարդասիրության դրսևորում։

Սեդա Ղուկասյան