04.02.2026 | 23:29
ՇՄ նախարարը և Դևիդ Կուպերը քննարկել են «Կենսաբանական բազմազանության մասին» կոնվենցիայի ներքո ընթացող գործընթացներ
Գյումրիում մեծ շուքով դիմավորեցին Մինսկից ժամանած չեմպիոններին
01.07.2019 | 21:54
Այսօր Գյումրիի մուտքի մոտ քաղաքի բնակիչները մեծ շուքով և ոգևավորվածությամբ դիմավորեցին Եվրոպական խաղերի չեմպիոններ բռնցքամարտիկներ Հովհաննես Բաչկովին ու Արթուր Հովհաննիսյանին։
Չեմպիոններին դիմավորելու էին եկել քաղաքային ու մարզային իշխանությունների ներկայացուցիչները՝ քաղաքապետ Սամվել Բալասանյանի ու մարզպետ Տիգրան Պետրոսյանի գլխավորությամբ, ինչպես նաև մարզիկների բարեկամները, ընկերներն ու երկրպագուները։
Ոգևորությունն, իսկապես, մեծ էր, քանի որ Հայաստանի հավաքականի մարզիկների նվաճած 5 ոսկե, 3 արծաթե և 3 բրոնզե մեդալներից՝ 3 ոսկին և 1 արծաթը նվաճել են գյումրեցի մարզիկները։
Եվրոպական խաղերի չեմպիոն Արթուր Ալեքսանյանն ու փոխչեմպիոն Կարապետ Չալյանը Մինսկից մեկնել էին ուսումնամարզական հավաքների, այդ պատճառով էլ չէին ժանանել Հայաստան։
Ավելի վաղ լրագրողների հետ զրույցում Հովհաննես Բաչկովը նշել էր, որ շատ ուրախ է Եվրոպայի կրկնակի չեմպիոն դառնալու կապակցությամբ։
«Ուրախ եմ, քանի որ կարողացա կրկնել 2017թ. հաջողությունը: Այս հաղթանակը նոր մեծ քայլ է դեպի նորանոր հաջողություններ և մեդալներ։ Գյումրեցիների հաղթանակներն արդեն ավանդույթ են դարձել։ Յուրաքանչյուր գյումրեցի ծնող սովորեցնում է իր երեխային, որ ամեն ինչում պետք է հաղթող լինել։ Սա ապրելակերպ է»,- ասել էր Հովհաննես Բաչկովը։
Նշենք, որ Մինսկում կայացած երկրորդ Եվրոպական խաղերում 64 կգ քաշային բռնցքամարտիկների պայքարում Հովհաննես Բաչկովը եզրափակչում 3-2 հաշվով հաղթել էր ֆրանսիացի Ուհմիա Սոֆիանին և դարձել չեմպիոն։
Բռնցքամարտիկ Արթուր Հովհաննիսյանն էլ 49 կգ քաշային կարգի եզրափակչում, մենամարտելով Վրաստանի ներկայացուցիչ Սախիլ Ալախվերդովի հետ, 4-1 հաշվով հաղթել էր նրան և հռչակվել Եվրոպական խաղերի երկրորդ չեմպիոն։
Էմմա Չոբանյան
