«Նիկոլ Փաշինյանը դեմ էր ԵՏՄ-ից դուրս գալու մասին իմ նախագծին, կարող է հիմա կարծիքը վերանայել է»․ Խաչատուր Քոքոբելյան

«Ազատ դեմոկրատներ» կուսակցության նախագահ Խաչատուր Քոքոբելյանը համոզված է, որ «Հայաստանին հրամցրել են» Վրաստանում անցկացված ՆԱՏՕ-ի «Agile Spirit 2017» զորավարժություններից հրաժարվելու որոշումը։

«Ակնհայտորեն զգացվեց, որ Հայաստանը հաշվի առնելով ռուսական կողմնորոշումը, ուղղակիորեն չմասնակցեց այդ զորավարժություններին, որոնք բառիս բուն իմաստով խաղաղպահ նկատառումներով էին իրացվում»,- ասաց Քոքոբելյանը։

Նրա համար անընդունելի է, որ Հայաստանը երբևէ Ռուսաստանից պաշտոնապես չի պահանջել, որ վերջինս դադարեցնի զենքի մատակարարումը իր հակառակորդին։ «Երբ որ ռմբակոծվում է Տավուշի սահմանը, երբոր զոհեր ենք ունենում խաղաղ բնակչության շրջանում, ի՞նչ բացատրություն է մինչ այս պահը տվել ՀԱՊԿ-ը»։ «Ազատ դեմոկրատներ» կուսակցության նախագահի համար անհասկանալի է, թե ինչու Ռուսաստանում չեն հիշում, իսկ Հայաստանում լռում են, որ Հայ-ռուսական բարեկամության համաձայնագրի համաձայն Ռուսաստանը պարտավոր է զենք չվաճառել Հայաստանի անվտանգությանը սպառնացող երկրին։

« Ինչու են լռում, երբ Ադրբեջանը սպառնում է տարածաշրջանում իր միակ ռազմավարական գործընկերոջը։ Ռուսները կարողանում են այսպես վարվել, որովհետև մենք իրենցից չենք պահանջում իրավունքների և պարտավորությունների իրացում»,- ասաց Քոքոբելյանը։

Ինչ վերաբերում է ԵՏՄ-ից դուրս գալու առթիվ «Ելք»-ի հայտարարություններին ու հնարավոր նախաձեռնությանը, ապա «Ազատ դեմոկրատներ» կուսակցությունը պարտաստ է աջակցել այդ նախաձեռնությանը և համագործակցել նման դիրքորոշում ունեցող բոլոր ուժերի հետ։

Խաչատուր Քոքոբելյանը հիշեցերց, որ ժամանակին ինքն էլ է նման օրեինգիծ ներկայացրել ԱԺ-ում։ «Նաև կհիշեք, թե ով դեմ արտահայտվեց, իշխանությունները ամբողջովին դեմ էին, այդտեղ դեմ էր նաև Նիկոլ Փաշինյանը, դա գաղտնիք չի, բայց կարող է` հիմա կարծիքը վերանայել է։ Ես անձնավորված խնդիրներ չեմ քննարկում»։

Մանրամասները դիտեք Factor.am-ի հետ «Ազատ դեմոկրատներ» կուսակցության նախագահ Խաչատուր Քոքոբելյանի հետ հարցազրույցում։

Մարինե Խառատյան