Սևանա լճում էականորեն նվազել է խեցգետնի չափաքանակը, պետք է շտապ միջոցներ ձեռնարկել. վարչապետը՝ նախարարին

ՀՀ կառավարության  այսօրվա նիստը մեկնարկեց կառավարության ղեկավար Կարեն Կարապետյանի մի շարք հանձնարարականներով: Դրանցից մեկը վերաբերում էր խեցգետնի ապօրինի որսին:

Ըստ վարչապետի՝ իրականացված ուսումնասիրությունները ցույց են տվել, որ ջրային ավազաններում, հատկապես՝ Սևանա լճում,  էականորեն նվազել է խեցգետնի չափաքանակը: Ստեղծված իրավիճակը, ըստ Կարապետյանի, պայմանավորված է ինչպես խեցգետնի որսի թերի կանոնակարգմամբ, որսի անվանական թույլտվությունների, դրանց տրամադրման կարգի և ոչ բավարար վերահսկողության իրականացմամբ, այնպես էլ Հայաստան ներկրված խեցգետնի որսի համար օգտագործվող ոչ համապատասխան ցանցերի կիրառմամբ:

Հաշվի առնելով վերոնշյալը վարչապետ Կարապետյանը հանձնարարեց բնապահպանության նախարար Արծվիկ Մինասյանին բացառել գործնականում նախորդ տարիներին տրված որսի թույլտվությունների ժամկետների երկարաձգման դեպքերը:

Կառավարության ղեկավարը նաև հանձնարարեց երկամսյա ժամկետում  մշակել և կառավարության աշխատակազմ ներկայացնել խեցգետնի որսի թույլտվության կարգի վերանայման վերաբերյալ առաջարկություններ՝  հստակ ձևակերպելով  պարտավորությունները: Բացի այդ, ներկայացնել որսագործիքների տեխնիկական պահանջների վերաբերյալ առաջարկություններ:

«Ռեսուրսն իրականում նվազել է, և մենք այդ ոլորտը, որը համարում ենք հեռանկարային, այսօր ճգնաժամային վիճակում է, շատ շտապ պետք է միջոցներ ձեռնարկել, պարոն Մինասյան»,- եզրափակեց Կարեն Կարապետյանը:

Շողիկ Գալստյան