Չեմ հավատում Սամվել Բաբայանի մասնակցությանը Լեոնիդ Ազգալդյանի, Նորիկ Դանիելյանի, Վլադիմիր Բալայանի սպանություններին․ Արայիկ Հարությունյան. ՏԵՍԱՆՅՈՒԹ

Արցախի պաշտպանության նախկին նախարար Սամվել Բաբայանի գրասենյակը հայտարարեց, որ Բաբայանի կողմնակիցների վրա կրակահերթերով հարձակվել են ԱՀ նախկին վարչապետ Արայիկ Հարությունյանի կողմնակիցները: Թեմայի շուրջ Factor.am-ը զրուցել է Արցախի նախկին վարչապետ, «Ազատ Հայրենիք» կուսակցության նախագահ Արայիկ Հարությունյանի հետ:

– Պարո՛ն Հարությունյան, միջադեպի կապակցությամբ Ձեր արձագանքում անդրադառնալով Սամվել Բաբայանի մեղադրանքներին՝ չեք հերքել միջադեպը՝ ասելով, որ, երևի, խուլիգանություն է եղել, որը կապ չունի Բաբայանի հետ: Սա նշանակո՞ւմ է, որ, այնուամենայնիվ, կրակահերթերով միջադեպի մասնակիցները Ձեր համակիրներն են:

– Արցախում մենք տասնյակ հազարավոր համախոհներ և համակիրներ ունենք, և հաճախակի լինում են հանցագործություններ, խուլիգանություններ, որոնց համար, իհարկե, մենք պատասխանատվություն չենք կրում: Բայց դեպքի հետ կապված արդեն կա պարզաբանում, որ այն որևէ քաղաքական ենթատեքստ չունի, իսկ անուններից մեկը, որ նշվել է, այդ անձն արդեն կատեգորիկ հերքել է, նշել է, որ այդ օրն ինքը դաշտերում էր:

– Մյուսները հաստատե՞լ են իրենց մասնակցությունը:

– Մեկը կիսահերքել է, մյուսներից որևէ արձագանք չկա, և ինձ թվում է՝ ժամերի կամ օրերի ընթացքում ամբողջ պատկերը կունենանք: Բայց այն, որ սովորական խուլիգանություն է տեղի ունեցել, արդեն ես դրանում համոզված եմ:

– Կրակահերթերով խուլիգանությո՞ւն:

– Լա՛վ, հանցագործություն: Ես չգիտեմ՝ կրակահերթերն ինչ աստիճանի են եղել, եղել են, թե չեն եղել, ես չեմ կարող դրան արձագանքել, թող իրավապահները գնահատական տան: Ես տեղյակ չեմ՝ կոնկրետ ինչ է կատարվել, ովքեր են մասնակցել և ինչն է եղել դրդապատճառը:

– Այնուամենայնիվ, Բաբայանի գրասենյակը, կոնկրետ անուններ նշելով, ասել է, որ դրանք Ձեր համակիրներն են:

– Ես արդեն ասացի՝ տասնյակ հազարավոր համակիրներ ունեմ Ղարաբաղում:

– Ասել է թե՝ նրանց առանձնապես չե՞ք ճանաչում:

– Շատ մոտիկից եմ ճանաչում: Նրանց մեծ մասին եմ մոտիկից ճանաչում, և նրանք հարյուրավոր չեն, հազարավոր են: Եվ կարող եմ կենսագրություններն էլ ներկայացնել:

– Փաստորեն՝ Ձեր համակիրների շրջանում կան կրակահերթերով հարցեր լուծող մարդիկ:

– Ո՛չ, չկան: Ես չգիտեմ՝ ինչ է տեղի ունեցել: Թողնենք՝ իրավապահները գնահատական տան: Եթե հանցագործություն է կատարվել, պիտի պատժվեն օրենքի ամենամեծ խստությամբ: Ով ուզում է՝ լինի. համակիր, համախոհ, հարազատ, բարեկամ… բոլորը պետք է պատասխանատվություն կրեն: Ոչ միայն մեկ կողմը, այլ երկրորդ կողմն էլ, եթե, իհարկե, մեղավորություն: Մենք դեռ չգիտենք՝ ինչ է կատարվել:

– Հայաստանի ԱԱԾ ղեկավարն այսօր ասաց, որ դա եղել է ֆինանսական խնդիրների շուրջ վեճ: Ձեր այդ համակիրները ի՞նչ ֆինանսական խնդիրներ կարող էին ունենալ Սամվել Բաբայանի հետ:

– Խնդրում եմ՝ ամեն անգամ մի ասեք՝ Ձեր համակիրները: Ես ունեմ շատ համակիրներ, և նրանց, որոնք թույլ են տալիս խախտում կամ հանցանք, պետք չէ կապել ուղղակի ինձ հետ: Ինչ վերաբերում է ֆինանսական խնդիրներին, դա Սամվել Բաբայանի հետ կապ չունեցող երևույթ է եղել, ընդամենը ֆինանսականը եղել է այդ անձանց միջև, և ունի տարիների պատմություն՝ որքան հասկացա տեղեկատվությունից:

– Սամվել Բաբայանի գրասենյակը նաև հայտարարել է, որ բազմիցս օգտվելով Արայիկ Հարությունյանի հովանավորչությունից՝ օրինակ, այդ խմբի ներկայացուցիչ Ռոլանդ Այդինյանն ազատվել է քրեական պատասխանատվությունից: Դուք ազատե՞լ եք Այդինյանին պատասխանատվությունից:

– Ես Այդինյանի համար չեմ խնդրել կամ միջնորդել որևէ քրեական պատասխանատվությունից ազատելու համար: Ինքն ընդամենը եղել է Քարվաճառի քաղաքապետ, երբ ես աշխատել եմ վարչապետ, փոքր անախորժության պատճառով ես իրեն խնդրել եմ դիմում գրել և ազատվել պաշտոնից: Ուրիշ որևէ դեպք ես չեմ հիշում, որ Ռոլանդ Այդինյանը քրեական հետապնդման ժամանակ իմ կամ որևէ մեկի միջնորդությամբ ազատվի: Եթե կան փաստեր, կարող եք մատնացույց անել և, եթե հնարավոր է, պատժենք այդ հանցանքների համար: Եկեք այդ կողմից նայենք իմ համախոհների առումով։ Ոչ թե կատարված կամ թույլ տրված այդ հանցանքը կամ խուլիգանությունը, որին գնահատական կտրվի։ Կարելի է այդ մյուս կողմից էլ գնահատել չէ նրանց։

– Ձեր աջակիցներից Ալեքսեյ Բալայանը, ով հայտնի հրամանատար Վլադիմիր Բալայանի տղան է, այսօր մեղադրեց Սամվել Բաբայանին իր հոր և Լեոնիդ Ազգալդյանի ու Նորիկ Դանիելյանի սպանության մեջ։ Ի՞նչն է պատճառը, որ Դուք տևական ժամանակ իշխանության մեջ եք եղել Արցախում և չեն բացահայտվել այդ սպանությունները և արդյո՞ք Դուք պատասխանատվություն չեք կրում այդ մասով:

– Ես, անկեղծ ասած, չեմ հավատում Սամվել Բաբայանի մասնակցությանը կոնկրետ, իրավունք չունեմ գնահատական տալու, բայց չեմ հավատում, թող իրավապահները գնահատական տան։ Երևի ավելի շատ Ալեքսեյն էմոցիաների տակ հայտարարություն է արել։ Չեմ կարող ասել՝ ինչքանով է իրականությանը համապատասխանում։

– Չե՞ք հավատում, որ Սամվել Բաբայանը կապ ունի այդ սպանությունների հետ։

– Չեմ ուզում հավատալ, բայց ես իրավունք չունեմ գնահատական տալու։ Չեմ ուզում հավատալ, որովհետև լեգենդար հրամանատարների անուններ են հնչեցվում:

– Այնուամենայնիվ, ինչո՞ւ այս սպանությունները չեն բացահայտվել Ձեր իշխանության ժամանաիկ, որ մինչև հիմա շահարկման առարկա են։

– Կոնկրետ ֆիքսված սպանություն միայն Նորիկ Դանիելյանինն է։ Այն երկուսը չեմ կարող ասել, որ սպանություն է։ Մանավանդ՝ Վլադիմիր Բալայանը եղել է, ինչքան գիտեմ, առաջնագծում։ Ես նրանց այդ ժամանակ չեմ ճանաչել և չեմ կարող գնահատական տալ: Նույնը՝ Լեոնիդի։ Թող իրավապահները, ականատեսները կամ այն ժամանակվա հրամանատարները գնահատական տան կամ որևէ կարծիք ասեն։ Ես սովորական զինվոր եմ եղել, ընդամենը տեղեկություն եմ լսել այն ժամանակ, որ զոհվել կամ սպանվել են:

– Բայց Դուք, որպես վարչապետ, թերևս պիտի այս սպանությունները… խնդիրը, մինչ այժմ կա, փաստորեն, և շահարկվում է։

– Ոչի՞նչ, որ վարչապետ եմ դարձել 2007 թվականին, իսկ խոսքը գնում է 1990-ականների մասին։ Ինչքանո՞վ է ճիշտ այսօր նորից գնալ, նորից փորփրել, կասկածի տակ դնել մեր հաղթանակը։ Ավելի շատ, երևի, Բալայանն էմոցիաների տակ վիրավորանքի պատասխան է տվել, որ իրեն վիրավորել են, բայց ես համոզված եմ, որ, երևի, ճիշտ չի արել։

– Սամվել Բաբայանը կոչ է արել բոլոր պատկան մարմիններին, հատկապես՝ ՀՀ ԱԱԾ-ին, հետամուտ լինել այս բանդան գտնելու և չեզոքացնելու գործընթացին, այլապես այս ամենը կարող է ավարտվել արյունահեղությամբ։ Սա նշանակում է հնարավոր  վենդետա՞:

– Ո՛չ, դրանից հետո հետևել է Սամվել Բաբայանի գրասենյակի այլ հայտարարություն, որով կոչ է արվել համերաշխության, և ես համոզված եմ, որ Սամվել Բաբայանն ունի բավական իմաստություն և զերծ է մնալու նման խուլիգանական կամ նեղ հարցերը քաղաքականացնելուց։ Ինչ-որ տեղ ես առաջին հայտարարության վրա կասկածում եմ՝ արդյո՞ք քննարկել են նրա հետ: Նա թույլ չէր տա նման հայտարարություն, իմ իմանալով, որովհետև այդ հայտարարությունն ի սկզբանե չուներ հիմնավորում։ Եթե եղել է դեպքը խուլիգանական կամ հանցանք է տեղի ունեցել, ի՞նչ կապ ունի Արայիկ Հարությունյանի հետ։ Այդ նույն մարդիկ Սամվել Բաբայանի հետ շատ ավելի վաղուց էին ծանոթ, քան ես:

Հարցազրույցն ամբողջությամբ՝ տեսանյութում:

Մարինե Խառատյան