ԱՄՆ Սենատը հավանություն է տվել Ռուսաստանի դեմ նոր պատժամիջոցների մասին օրինագծին

ԱՄՆ Սենատը հավանություն է տվել Ռուսաստանի դեմ նոր պատժամիջոցների մասին օրինագծին, որը նախատեսում է Ռուսաստանի հետ համագործակցող երկրների նկատմամբ մինչև 100% մաքսատուրքեր սահմանելու հնարավորություն։ Այժմ փաստաթուղթը պետք է քննարկի Ներկայացուցիչների պալատը, որից հետո այն կներկայացվի նախագահ Դոնալդ Թրամփի ստորագրմանը։

Reuters-ի փոխանցմամբ՝ օրինագիծը նախագահին լիազորում է մինչև 100% մաքսատուրքեր սահմանել այն երկրների նկատմամբ, որոնք գնում են ռուսական նավթ, բնական գազ, ուրան կամ աջակցում են Ռուսաստանի նկատմամբ սահմանված պատժամիջոցների շրջանցմանը։

Փաստաթուղթը նաև նախատեսում է պատժամիջոցներ Ռուսաստանի պաշտպանական, էներգետիկ և ֆինանսական կազմակերպությունների, այսպես կոչված «ստվերային նավատորմի», ինչպես նաև ռուս պաշտոնյաների, օլիգարխների և նրանց ընտանիքների անդամների նկատմամբ։

Օրինագիծը ներկայացվել էր դեռևս 2025 թվականին, սակայն երկար ժամանակ առաջ չէր շարժվում՝ նախագահ Դոնալդ Թրամփի դիրքորոշման անորոշության պատճառով։ Նախնական տարբերակում առաջարկվում էր Ռուսաստանի նավթ և գազ գնող երկրների նկատմամբ սահմանել մինչև 500% մաքսատուրքեր, սակայն հետագայում այդ դրույթը վերանայվել է՝ սահմանելով մինչև 100% դրույքաչափ։

Եթե օրինագիծն ընդունվի նաև Ներկայացուցիչների պալատի կողմից և ստորագրվի նախագահի կողմից, այն կլինի առաջին դեպքը, երբ ԱՄՆ Կոնգրեսը մաքսատուրքերը կկիրառի որպես աշխարհաքաղաքական ազդեցության գործիք։