19.12.2025 | 18:58
Ադրբեջանի խորհրդարանը հաստատել է երկրի պատմության մեջ ամենամեծ համաներումը
«Չպետք է թույլ տալ Ադրբեջանին ֆուտբոլի անվան տակ ոտնահարել մարդու իրավունքները». Amnesty International-ը Մխիթարյանի՝ Բաքու չմեկնելու մասին հայտարարություն է տարածել
Քաղաքականություն
23.05.2019 | 14:55
Amnesty International-ը ուժեղացրել է ֆուտբոլի Եվրոպայի ղեկավար մարմնի՝ ՈՒԵՖԱ-ի նկատմամբ ճնշումը՝ նշելով, որ չի կարելի թույլ տալ Ադրբեջանին սպորտի միջոցով ոտնահարել մարդու իրավունքները:
Բաքվի օլիմպիական մարզադաշտը հաջորդ չորեքշաբթի հյուրընկալելու է Եվրոպայի լիգայի եզրափակիչ խաղը։ ՈՒԵՖԱ-ի այս որոշումը սուր քննադատության է ենթարկվել ինչպես ֆուտբոլի երկրպագուների, այնպես էլ մարդու իրավունքներով զբաղվողների կողմից։ Նախօրեին էլ «Արսենալի» կիսապաշտպան Հենրիխ Մխիթարյանը հայտարարել էր, որ, անվտանգության նկատառումներից ելնելով, չի մեկնի Բաքու։
«Ադրբեջանը մարդու իրավունքների սարսափելի խախտումների աքցանների մեջ է, որտեղ անողոք հետապնդման են ենթարկվում լրագրողները, բլոգերներն ու իրավապաշտպանները: Անարդար դատավարություններն ու զրպարտչական արշավները սովորական երևույթ են այդ երկրում»,- նշել է բրիտանական Amnesty International-ի ղեկավար Քեյթ Ալենը։
Նրա խոսքով՝ կառավարությունները նման բարձրակարգ սպորտային մրցույթներն օգտագործում են ուշադրությունը ռեպրեսիվ քաղաքականության և մարդու իրավունքների խախտումներից շեղելու և փոխարենն ավելի ազատ պատկեր ստեղծելու համար։ Ներկայիս կառավարության համար սա ճշմարտությունից հեռու չէ և «Արսենալ»-«Չելսի» հանդիպումը դրա թարմ ապացույցն է։ Ըստ Ադրբեջանի մարդու իրավունքների պաշտպանի՝ երկրում ավելի քան 150 քաղբանտարկյալ կա, զանգվածային ձերբակալությունների միջոցով լռեցնում են մեդիան և հաշվեհարդար տեսնում ոչ կառավարական կազմակերպությունների հետ։
Բացի այդ, «Լրագրողներ առանց սահմանների» կազմակերպության մամուլի ազատության վարկանիշային աղյուսակում Ադրբեջանը 166-րդն է։
Մինչ այժմ, ՈւԵՖԱ-ի կողմից ընտրության եզրափակիչը Բաքվում անցկացնելու որոշմանն ուղղված քննադատության հիմնական պատճառը Մեծ Բրիտանիայից Ադրբեջան հասնելու դժվարությունը և տեղացի երկրպագուներին հատկացված մեծ թվով տոմսերն էին։
ՈւԵՖԱ-ն նշել էր, թե Եվրոպա լիգայի եղզրափակիչ հանդիպումը Բաքվում անցկացնելու որոշումը 2017-ին էր կայացվել և նախապես հնարավոր չէր իմանալ, որ լոնդոնյան երկու ակումբներն էլ եզրափակիչ կհասնեին։ Տոմսերի մասով էլ ՈՒԵՖԱ-ն ընդգծել էր, որ բաշխումը հիմնված է եղել այն բանի վրա, թե Բաքվի օդանավակայանը քանի երկրպագուի կարող է սպասարկել: Ադրբեջանի ֆուտբոլի ասոցիացիան էլ հայտնել է, որ ափսոսում է Մխիթարյանի՝ Բաքու չգնալու «անտեղի» որոշման համար։
Նելլի Մելքոնյան
