«Ուզո՞ւմ ես ֆուտբոլ խաղալ, արի Բաքու, մենք կապահովենք քո անվտանգությունը». Մեծ Բրիտանիայում Ադրբեջանի դեսպանի ուղարձը Հենրիխ Մխիթարյանին

Ուրախ կլինեմ, եթե Մխիթարյանն անձամբ ինձ հետ զրույց ունենա: Սա առաջնակարգ իրադարձություն է, սակայն եթե մեր նպատակը «քաղաքական խաղեր» խաղալն է, դա այլ բան է: Մխիթարյանը վճարվում է ֆուտբոլիստ, ոչ թե քաղաքական գործիչ լինելու համար: Այս մասին Sky Sports News-ին տված հարցազրույցում նշել է Մեծ Բրիտանիայում Ադրբեջանի դեսպան Թահիր Թաղիզադեն:

Նրա խոսքով՝ «Արսենալի»  հայազգի կիսապաշտպանը կարող է իր հետ  կապվել և  Բաքվում կայանալիք Եվրոպայի լիգայի եզրափակչին մասնակցելու համար անվտանգության երաշխիքներ ստանալ:

Մեծ Բրիտանիայում Ադրբեջանի դեսպանի խոսքով՝ Մխիթարյանի այցը Բաքու հղի է հետևանքներով, որոնց թվում և կառավարության կողմից Ադրբեջանի սև ցուցակում հայտնվելն է: Այդուհանդերձ, ըստ դեսպանի, դա չի խանգարի նրա անվտանգության ապահովմանը:

«Մխիթարյանի խնդիրն այն է, որ  նա առանց Ադրբեջանի կառավարության թուլտվության այցելել է Ադրբեջանի՝ ռազմական շրջափակման մեջ գտնվող տարածք»,- ասել է Թաղիզադեն:

Նա հավելել է, որ Մխիթարյանին ուղերձ ունի:

«Դու ֆուտբոլիստ ես, ուզո՞ւմ ես ֆուտբոլ խաղալ, արի Բաքու, մենք կապահովենք քո անվտանգությունը: Ես կարող եմ երաշխավորել, որ Ադրբեջանի կառավարությունը կանի ամեն բան՝ ապահովելու ֆուտբոլային հանդիպմանը մասնակցող յուրաքանչյուր երկրպագուի, խաղացողի և անձնակազմի անդամի  անվտանգությունը»,- ընդգծել է Մեծ Բրիտանիայում Ադրբեջանի դեսպանը:

Հիշեցնենք, որ ՈՒԵՖԱ-ի Եվրոպայի լիգայի  եզրափակիչ խաղը կկայանա մայիսի 29-ին՝ Բաքվում։  Ավելի վաղ «Արսենալն» իր դժգոհությունն էր հայտնել հանդիպումն Ադրբեջանի մայրաքաղաքում անցկացնելու վերաբերյալ, պարզաբանելով, որ Մեծ Բրիտանիայից Ադրբեջան հասնելը դժվար է։  Բացի այդ, ֆուտբոլային ակումբը նաև դժգոհ էր այն բանից, որ խաղը, հնարավոր է, առանց Հենրիխ Մխիթարյանի անցկացվի։

Նելլի Մելքոնյան

.