07.03.2026 | 22:11
Նոր նշանակումներ՝ մարմնամարզության Հայաստանի հավաքականներում
Մարտի 1-ին Ռուբեն Հայրապետյանի կամ Սամվել Ալեքսանյանի արարքներում հանցակազմ կա՞, թե՝ ոչ․ Նորայր Նորիկյան. ՏԵՍԱՆՅՈՒԹ
Քաղաքականություն
13.05.2019 | 20:32
Factor.am-ի հարցազրույցը փաստաբան Նորայր Նորիկյանի հետ
– Պարո՛ն Նորիկյան, այսօր սկսվեց Ռոբերտ Քոչարյանի և նախկին երեք այլ պաշտոնյաների գործով դատավարությունը: Այսօր առաջին օրն էր, թեև քննարկվում էր նախկին նախագահի խափանման միջոցի հարցը: Ձեր կարծիքով՝ որքանո՞վ է անհրաժեշտ Ռոբերտ Քոչարյանին պահել կալանքի տակ: Արդյոք արդեն, երբ նախաքննությունն ավարտվել է և դատաքննության փուլն է սկսվել, նրա ազդեցությունը գործի ընթացքի վրա չի՞ նվազել:
– Գոնե ինձ համար՝ որպես ՀՀ քաղաքացու, որը որոշակի պատկերացում է ունեցել Ռոբերտ Քոչարյանի հնարավոր ազդեցության, նրա տրամաչափի և, ընդհանրապես, սույն գործի առանձնահատկությունների մասին, բերել է այն հանգրվանի, որ այս փուլում, քանի դեռ նոր է մեկնարկում դատավարությունը, Քոչարյանի՝ ազատության մեջ մնալու պայմաններում հնարավոր է, որ վերջինիս կողմից որևէ ճնշում գործադրվի դատավարության մասնակիցների վրա, ինչը կխաթարի գործի բազմակողմանի, լրիվ և օբյեկտիվ քննությանը: Ուստի, այս պայմաններում, որքանով տեղյակ եմ գործի հրապարակայնացման շրջանակում, գործի բնույթն ու առանձնահատկությունը կայանում է նրանում, որ Ռոբերտ Քոչարյանը սույն քրեական գործի շրջանակում առանձնահատուկ դերակատարություն է ունեցել: Հանդիսանալով Զինված ուժերի գերագույն գլխավոր հրամանատար՝ իր ուղղակի կամ անուղղակի ցուցումներով, գրավոր կամ բանավոր հրահանգներով Զինված ուժերը ներքաշվել է քաղաքական գործընթացների մեջ, որով տապալվել է սահմանադրական կարգը: Ինքը հրապարակել է նաև ապօրինի, իր լիազորությունները գերազանցող՝ արտակարգ դրություն հայտարարելու մասին հրամանագիր՝ չունենալով դրա սահմանադրական լիազորությունները, և երկրորդ՝ չմոռանանք, որ նրան առաջադրված է ոչ պակաս ծանր մեղադրանք՝ առանձնապես խոշոր չափերի կաշառք ստանալը: Ընդհանրապես՝ Ռոբերտ Քոչարյանին առաջադրված երկու մեղադրանքներն էլ դասվում են առանձնապես ծանր հանցագործությունների շարքին, որոնք ենթադրում են ազատազրկում 10 տարուց ավելի ժամկետով: Եվ հաշվի առնելով նրա անձը, դերակատարությունը, հնարավոր ռեսուրսները՝ չի բացառվում, որ ազատության մեջ մնալու դեպքում կարող է նրա վարքագծի՝ պատշաճ լինելու խնդիր առաջանալ:
– Ի՞նչ ռեսուրսների մասին է խոսքը:
– Բոլոր… այդ թվում՝ ստվերային աջակցության, նյութական, ունեցած հնարավոր ներքին ու արտաքին կապերի, որոնք կարող են օգտագործվել՝ դատավարության վրա ստվեր նետելու և դատական պրոցեսի վրա անօրինական ազդեցություն ունենալու համար:
– Որոշակի ռեսուրսների տիրապետում են նաև Յուրի Խաչատուրովն ու Սեյրան Օհանյանը: Ինչո՞ւ նրանց նկատմամբ չկիրառվեց կալանքը որպես խափանման միջոց, սակայն կիրառվեց Ռոբերտ Քոչարյանի նկատմամբ:
– Այդ ազգանունները հնարավորություն են տալիս արձանագրելու, որ մենք գործ ունենք տրամաչափով և քաշային կատեգորիայով տարբեր անձանց հետ: Այդ անձանց դերակատարությունն էլ Մարտի 1-ի իրադարձությունների ժամանակ, ըստ առաջադրված մեղադրանքի, թեև ոչ պակաս ծանր են, այդուհանդերձ, գործ ունենք տարբեր մարդկանց հետ, որոնց պատշաճ վարքագիծը վերահսկողության տակ պահելու համար մենք կարող ենք ունենալ տարբեր արդյունքներ:
– Ռոբերտ Քոչարյանի պաշտպանական խումբը հակադարձում է, որ երկրորդ նախագահը սահմանադրական կարգի տապալման համար որևէ քայլ չի արել: Ձեր կարծիքով ո՞ր արարքն է, որը կարող է ապացուցել, որ նախկին նախագահը սահմանադրական կարգ է տապալել:
– Ես կզարմանայի, որ Ռոբերտ Քոչարյանի պաշտպանական թիմն այլ բան ասեր: Բնականաբար՝ իրենց պաշտպանյալի շահերից բխող հայտարարություններ պետք է անեն և այդպիսի ռազմավարություն ու մարտավարություն պետք է մշակեն: Բայց եկեք միասին վերլուծենք՝ ինչ է տեղի ունեցել: 2008 թվականի փետրվարի 23-ին հրապարակվել է պաշտպանության նախարարարի գաղտնի՝ 0038 հրամանը, որով ձևավորվել է Երևանի կայազոր: Կայազորի պետ է նշանակվել այն ժամանակվա պաշտպանության նախարարի տեղակալ, գեներալ Խաչատուրովը: Վերջերս մամուլում հրապարակված քրեական գործի նյութերից պարզ դարձավ, որ այդ կայազորի վարչակազմը տեղակայվել է ՀՀ Կառավարության մասնաշենքում, մասնավորապես՝ վարչապետին հարող սենյակում: Այդ կայազորին տրամադրվել են ՀՀ Զինված ուժերի և հատկապես Արցախի Պաշտպանության բանակի ստորաբաժանումներից կազմված գումարտակներ, որոնք նույնպես տեղակայվել են Երևան քաղաքում: Սա նշանակում է, որ ՀՀ գերագույն գլխավոր հրամանատարի լուռ համաձայնությամբ կամ ուղղակի ցուցումով պաշտպանության նախարարն արձակել է ՀՀ Սահմանադրությանը հակասող հրաման, որի արդյունքում ձևավորվել է Երևանի կայազոր, այդ կայազորի ենթակայության տակ են դրվել ՀՀ Զինված ուժերի տարբեր ստորաբաժանումներ, որոնք բերվել են Երևան քաղաք և իրականացրել են իրենց գործառույթներից չբխող գործողություններ:
– Ռոբերտ Քոչարյանի որդին՝ Լևոն Քոչարյանը այսօր հայտարարեց, թե իր հոր նկատմամբ վրեժխնդրություն է իրականացվում։ Կա՞ նման երևույթ։
– Ո՞ւմ կողմից իրականացվի վրեժխնդրություն և ի՞նչ խնդիր լուծվի։ Եթե վրեժխնդրություն է իրականացվում, այս երկրում կան այլ մարդիկ, որոնց նկատմամբ այդ նույն տրամաբանությամբ պետք է իրականացվեր վրեժխնդրություն։ Բայց ճիշտ հակառակ գործընթացն է, այս երկրում դեռ կան մարդիկ, որոնք պետք է այս պահին անազատության մեջ լինեին, բայց վայելում են ազատությունը։
– Ո՞ւմ մասին է խոսքը։
– Շատերի։ Մարդիկ հարցնում են, թե արդյոք Սերժ Սարգսյանը կամ փաստահավաք խմբի կողմից հրապարակված օլիգարխների արարքներին իրավական գնահատական պետք է տրվի՞, թե՝ ոչ։ Վարույթ իրականացնող մարմինը պետք է այդ ցուցակը հրապարակի և ասի, օրինակ, Ռուբեն Հայրապետյանի արարքում հանցակազմ կա՞, թե՝ չկա: Կամ Ռուբեն Հայրապետյանին, Սամվել Ալեքսանյանին կամ մյուսներին մեղսագրվո՞ւմ են այս կամ այն արարքները, կամ այդ հայտարարություն անողները պե՞տք է ենթարկվեն պատասխանատվության։
Հարցազրույցն ամբողջությամբ՝ տեսանյութում:
Արմինե Ավետյան
