Ջրային կոմիտեի առաջ հստակ հանձնարարական է դրվելու. վարչապետը մաքսիմալ հսկողություն կսահմանի

 ՀՀ կառավարության այսօրվա նիստում վարչապետ Կարեն Կարապետյանի հանձնարարականներից մեկը վերաբերում էր ոռոգվող հողատարածքների մակերեսների ավելացմանը:

«Համաձայն հողային հաշվեկշռի տվյալների՝ հանրապետության ոռոգելի հողատարածքները կազմում են շուրջ 208 հազար հեկտար, սակայն վերջին տարիների փաստացի ոռոգվող հողատարածքները տատանվում են 90-130 հազար հեկտարի սահմաններում: Կատարված վերլուծություններից հետևում է, որ ոռոգվող և ոռոգելի հողատարածքների այդպիսի տարբերությունը հատկապես պայմանավորված է հողային և ջրային ռեսուրսների, ինչպես նաև ոռոգման ենթակառուցվածքների հնարավորությունների ոչ արդյունավետ օգտագործմամբ, ինչն անթույլատրելի է որգեգրված գյուղացիական տնտեսությունների զարգացման ծրագրերի պայմաններում»,- ասաց Կառավարության ղեկավարը:

Հաշվի առնելով վերոնշյալը Կարապետյանը հանձնարարեց տարածքային կառավարման և զարգացման, բնապահպանության և գյուղատնտեսության նախարարներին և մարզպետներին մեկամսյա ժամկետում Ջրային տնտեսության պետական կոմիտեին տրամադրել ոռոգելի տարածքների ավելացման վերաբերյալ անհրաժեշտ նյութեր և տեղեկատվություն՝ ըստ պատկանելիության: Ջրային տնտեսության պետական կոմիտեի նախագահին էլ հանձնարարեց վերոնշյալ տվյալները ստանալուն պես երկուամսյա ժամկետում ոլորտի շծահագրգիռ մարմինների հետ համատեղ ձեռնարկել միջոցներ՝ ոռոգման համակարգերի շահագործման արդյունավետությունը բարձրացնելու ուղղությամբ և կառավարության աշխատակազմ ներկայացնել հողատարածքների ավելացման վերաբերյալ առաջարկություն՝ նախատեսելով համապատասխան միջոցառումների ժամանակացույց:

«Խնդիրն ինձ թվում է ՝ շատ պարզ է ձևակերպված, մենք այստեղ շատ-շատ անելիք ունենք, իրականում այն ծրագրերը, որոնք որ նախատեսում ենք գյուղատնտեսության ոլորտում կիրառել, օգտագործել, ապագա չունեն, եթե մենք այս խնդիրը ֆունդամենտալ չլուծենք: Եթե հիշում եք՝ մենք ջրային ստրատեգիայի վերաբերյալ ունենք հանձնարարություն՝ փոքր և միջին ջրամբարների կառուցման առումով, պետք է հստակ ջրային կոմիտեի առջև ձևակերպել հանձնարարականը և սահմանել մաքսիմալ հսկողություն»,- եզրափակեց Կարապետյանը:

Շողիկ Գալստյան