«Չեմ կարող նստել ու մտածել, թե ով է շպիոն». Նաիրա Զոհրաբյանը՝ վարչապետի հայտարարության մասին

Գագիկ Ծառուկյանը չի հանդիպել Ռոբերտ Քոչարյանի որդու՝ Սեդրակ Քոչարյանի հետ: Այս մասին ԱԺ-ում Factor.am-ի հարցին ի պատասխան՝ ասաց ԲՀԿ-ական պատգամավոր Նաիրա Զոհրաբյանը:

Հիշեցնենք, որ մամուլն այսօր գրել էր, որ Ծառուկյանը հանդիպել է Սեդրակ Քոչարյանի հետ: Նաիրա Զոհրաբյանը հերքեց նաև այն տեղեկությունները, որ Գագիկ Ծառուկյանը հանդիպել է ԼՀԿ-ի ներկայացուցիչների հետ: Ըստ մամուլի՝ նրանք որոշել են պայքարել Փաշինյանի դեմ:

«Ես հասկանում եմ, որ լրագրությունը Կիկոսի մահի ժանրի վերածելը գնալով ավելի է շատանում, բայց տեղեկատվությունը չի համապատասխանում իրականությանը»,- ասաց պատգամավորը: Զոհրաբյանը մտահոգիչ է համարում այն, որ առաջիկայում տեղի է ունենալու 10 հազար պետական աշխատակցի կրճատում:

Հիշեցնենք, որ երեկվանից ֆեյսբուքում շրջանառվում է փաստաթուղթ՝ փոխվարչապետի եւ ֆինանսների նախարարի կողմից ստորագրված, որով մինչև մարտի 31-ը պետք է հստակեցվի, թե այս կրճատումները ո՞ր կառույցներում են լինելու:

Պատգամավորից հետաքրքրվեցինք՝ կո՞ղմ է, որ Հայաստանում քաղաքացու օր նշվի: «Երբ նման նախաձեռնություն կգա Ազգային ժողով, կներկայացվեն հիմնավորումները, մեր կարծիքը կասենք»,- պատասխանեց նա:

Լրագրողները Նաիրա Զոհրաբյանից հետաքրքրվեցին նաև Նիկոլ Փաշինյանի հայտարարությունից այն մասին, որ Հայաստանի քաղաքական գործիչներն ավելի շատ օտարերկրյա գործակալների են նման: Պատգամավորն ասաց՝ չգիտի, թե խոսքն ու՞մ մասին է. «Ես այնքան կարևոր գործեր ունեմ, որ չեմ կարող նստել ու մտածել, թե ով է շպիոն: Դա իմ գործառույթների մեջ չի մտնում»:

Մանրամասները՝ տեսանյութում:

Նարեկ Կիրակոսյան