21.04.2026 | 23:25
Եթե յուրաքանչյուրին ձայնագրես, ամեն մեկը մի բան կասի. Կարապետյանը՝ «շուն ու շանգյալ» բնորոշման մասին. ՏԵՍԱՆՅՈՒԹ
Տարվա խիզախ կնոջից մինչև կառավարության բարեփոխիչ․ կայացավ «Համընդհանուր իրավունքներ 2018» մրցանակաբաշխությունը. ՏԵՍԱՆՅՈՒԹ
Հասարակություն
20.02.2019 | 21:50
Մարդու իրավունքներ, խոսքի ազատություն, իրավական բարեփոխումներ և ժողովրդավարության խթանում՝ ինը անվանակարգում․ կայացավ «Համընդհանուր իրավունքներ 2018» մրցանակաբաշխությունը։
2012-ից ի վեր՝ ամեն տարի մրցանակաբաշխությամբ նշանավորվում են մարդու իրավունքների և ազատությունների առաջխաղացման ոլորտում Հայաստանի քաղաքացիական հասարակության, լրատվամիջոցների ներկայացուցիչների և պետակական գործիչների նշանակալի ներդրումները։
Վարչապետ Փաշինյանի կարծիքով՝ իրավունքների պաշտպանության բանաձևի հիմքում հավասար հնարավորությունների ստեղծումն է։
«Մեր բանաձևն իրավունքների հավասար հնարավորություններ ստեղծելն է բոլոր քաղաքացիների համար և այդ հավասար հնարավորությունների նկատմամբ հավասար հասանելիություն ստեղծելը: Մենք հետևողականորեն գնալու ենք այդ ճանապարհով, որովհետև մեր քաղաքական տեսակետը և հայացքը, գաղափարախոսությունը հետևյալն է, որ իրավունքների պաշտպանության համատեքստում առաջին անելիքն այն է, որ Հայաստանի Հանրապետությունում յուրաքանչյուր քաղաքացի իր սոցիալական, գիտական, տնտեսական, քաղաքական դիրքին արժանանա իր օբյեկտիվ ընդունակությունների իրացմամբ»,- նշեց վարչապետը։
«Համընդհանուր իրավունքներ» մրցանակաբաշխությանը ինը անվանակարգ է ներկայացված։ Դրանցից յուրաքանչյուրն արժևորում է իրավունքների պաշտպաններին՝ ամենատարբեր ոլորտներում․ առողջապահությունից մինչև գենդերային իրավունքներ ու ժողովրդավարություն։
Տարվա «Երիտասարդ առաջնորդը» «Ռեստարտ» ուսանողական նախաձեռնության անդամ Դավիթ Պետրոսյանն է։ Ապագա առաջնորդներին հորդորում է սեփական կարծիքը երբեք ներսում չպահել։
«Ես կարևորեցի հատկապես կրթության իրավունքը, քանի որ արդարություն, հավասարություն, խտրականության դեմ պայքար․ այդ ամենն ուղղակիորեն պայմանավորված է կրթության հետ։ Մեր կազմակերպությունը փորձում է հիմնականում կրթական ռեֆորմներ իրականացնել, ավելի շատ կենտրոնացած ենք հենց բուհերի վրա։ Այս պահին տարբեր բուհերում տարբեր պրոցեսներ են տեղի ունենում և շատ կարևոր է, որ այդ բոլոր պրոցեսները տեղի ունենան այդ արժեքների շրջանակում, քանի որ պայքարը հենց այդ արժեքների համար է»,- ընդգծեց Դավիթ Պետրոսյանը։
Մրցանակաբաշխությանը նաև տարվա «խիզախ կինն» է ներկա՝ Վարդինե Գրիգորյանը։ Գենդերային կարծրատիպերին մարտահրավեր նետելով՝ փորձել է հասնել հավասար իրավունքների հաստատմանը։ Նրա կարծիքով՝ հիմնական խնդիրն այս պահին կանանց քաղաքական ներկայացվածությունն է։
«Կանայք սեփական նախաձեռնությամբ մասնակցում են քաղաքական գործընթացներին, սակայն երբ հարցը վերաբերում է պաշտոնների նշանակմանը, կանայք ավելի քիչ են։ Մինչդեռ մենք գիտենք, որ թե՛ կրթության, թե՛ ընդհանուր պատրաստվածության մակարդակով կանայք չեն զիջում և ուղղակի ստացվում է, որ իրենք այդքան հավակնոտ չեն։ Իսկ դրանից օգտվում են անհավասարության ջատագովները»,- նշեց Վարդինե Գրիգորյանը։
Ներկայացված անվանակարգերում նաև տարվա «Կառավարական բարեփոխիչն» է։ Այս անգամ՝ մրցանակն Առողջապահության նախարարությանն է բաժին ընկել։ Նախարար Արսեն Թորոսյանն ընդգծում է, որ առողջության իրավունքն ամենակարևորներից է։
«Ուզում եմ հաստատակամորեն ասել, որ մենք հեղափոխական և ողջամիտ բարեփոխումներ ենք անելու, քանի որ խնդիր ունենք երկար տարիների կորսվածը շատ կարճ ժամանակում հետ բերելու։ Վերադառնալով մրցանակաբաշխության խորհրդին, ուզում եմ հիշեցնել, որ ՀՀ-ն իրավական և սոցիալական պետություն է և առողջ մնալու իրավունքը նույնպես համամարդկային իրավունքների մաս է կազմում։ Մենք ջանք չպետք է խնայենք, որպեսզի այդ իրավունքն օր օրի ավելի լավ ապահովենք»,- ընդգծեց Արսեն Թորոսյանը։
«Համայնքային զարգացում» անվանակարգում հաղթողը գյումրեցի Տիգրանուհի Հակոբյանն է՝ առաջին ներառական փուռ-սրճարանի ծրագրի ղեկավարը։
«Ազատության պաշտպանը» Մարիա Կարապետյանն է, ներառականության խթանման ոլորտում առաջատարը՝ Ուսօ Հաջի Նադոյանը։ Իր աշխատանքով փորձել է եզդի համայնքի երիտասարդների համար հավասար հնարավորություններ ստեղծել։
«Համագործակցության ջատագով» մրցանակը շնորհվեց «Չայ Խանա» մեդիա հարթակին, իսկ «Արդարադատության մատչելիություն» անվանակարգում՝ Հայկուհի Հարությունյանին։
Իսկ ահա մեր գործընկեր Թաթուլ Հակոբյանն էլ «Ողջամիտ և անկախ լրագրողական նյութերի» պատրաստման համար արժանացավ «Մեդիա գերազանցություն» մրցանակին։
Մանրամասները՝ տեսանյութում:
Նելլի Մելքոնյան
