07.10.2026 | 23:48
Արթուր Դանիելյանը կալանավորվեց
ՌԴ-ն Ուկրաինայի ուղղությամբ ավելի քան 100 ԱԹՍ է արձակել` անտեսելով 30-օրյա հրադադարի կոչերը
Քաղաքականություն
12.05.2025 | 15:17
Ռուսական զորքերը մայիսի լույս 12-ի գիշերն Ուկրաինայի տարածքի ուղղությամբ արձակել է 108 գրոհային անօդաչու թռչող սարք և անօդաչուի իմիտատորներ։ Այս մասին հայտնում է Ուկրաինայի ռազմաօդային ուժերի հրամանատարությունը։
Նշվում է, որ Ուկրաինայի զինված ուժերին հաջողվել է խոցել 55 հարձակողական անօդաչու թռչող սարք, 30 անօդաչու «կորել է՝ առանց բացասական հետևանքների»։ Հարձակումն իրականացվել է Բրյանսկից, Օրյոլից, Շատալովոյից, Միլլերովոյից, Պրիմորսկո-Ախտարսկից, ինչպես նաև բռնակցված Ղրիմից։ Ուկրաինայի ռազմաօդային ուժերի հրամանատարության տվյալներով՝ անօդաչու թռչող սարքի հարձակումից տուժել են Օդեսայի, Նիկոլաևի, Դոնեցկի և Ժիտոմիրի մարզերը։
Հաղորդվում է նաև, որ ռուսական անօդաչու թռչող սարքը հարձակվել է Դոնեցկի մարզում քաղաքացիական բեռնատար գնացքի վրա։
«Հարվածի հետևանքով մեքենավարը ոտքի շրջանում բեկորային վերք է ստացել»,- տելեգրամում հայտնել է Ուկրաինայի «Ուկրզալիզնիցա» երկաթուղային ընկերությունը։
Նշվում է, որ մեքենավարը հոսպիտալացվել է, նրա կյանքին վտանգ չի սպառնում։ Գնացքների երթևեկությունը չի դադարեցվել։ Ընկերությունը մատնանշել է Ուկրաինայի երկաթուղային ենթակառուցվածքների և շարժակազմի վրա Ռուսաստանի կողմից շարունակվող հարձակումները։
Ավելի ուշ Կուրսկի մարզի իշխանություններն Ուկրաինայի զինված ուժերին մեղադրել են Ռիլսկի վրա հրթիռային հարված հասցնելու մեջ։ Նահանգապետի պաշտոնակատար Ալեքսանդր Խինշտեյնի պնդմամբ՝ քաղաքի մուտքի մոտ գտնվող հյուրանոցը հարված է ստացել, և երեք մարդ վիրավորվել է։
Մայիսի 10-ին Ուկրաինայի իշխանությունները հայտարարել էին, որ պատրաստ են «լիակատար և անվերապահ հրադադարի ցամաքում, օդում և ծովում առնվազն 30 օրով», որը կսկսվի մայիսի 12-ից։ Մայիսի 11-ի գիշերը Ռուսաստանի նախագահ Վլադիմիր Պուտինն առաջարկել էր մայիսի 15-ին Ստամբուլում ուղիղ բանակցություններ սկսել։
Ուկրաինան և նրա եվրոպացի դաշնակիցները հայտարարել են, որ Ռուսաստանը նախ պետք է համաձայնի 30-օրյա հրադադարի՝ նախքան բանակցությունների մեկնարկը։ ԱՄՆ նախագահ Դոնալդ Թրամփն իր հերթին կոչ էր արել Ուկրաինային հնարավորինս շուտ բանակցություններ սկսել Ռուսաստանի հետ։
Ուկրաինայի նախագահ Վլադիմիր Զելենսկին հայտարարել էր, որ պատրաստ է անձամբ հանդիպել Պուտինի հետ Ստամբուլում։ Լրատվամիջոցներն էլ ավելի վաղ հայտնել էին, որ Զելենսկին մայիսի 15-ին կգնա Թուրքիա՝ հնարավոր բանակցությունների, նույնիսկ եթե ՌԴ-ն հրաժարվի մայիսի 12-ի բանակցություններից։
Թարգմանությունը՝ Էմմա Չոբանյանի
