28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
Կատարը կարող է Թրամփին գերշքեղ Boeing 747 ինքնաթիռ փոխանցել, որն անվանում են «թռչող պալատ»
Քաղաքականություն
12.05.2025 | 16:12
Սպիտակ տունը բանակցություններ է վարում Կատարի թագավորական ընտանիքի հետ ԱՄՆ-ին շքեղ Boeing 747 ինքնաթիռը փոխանցելու մասին՝ նախագահական Air Force One-ի կարգավիճակում օգտագործելու համար։ Այս մասին հաղորդում են ամերիկյան լրատվամիջոցները, որոնց վկայակոչում է BBC-ի ռուսական ծառայությունը։
Կատարը հերքում է, որ դա նվեր կլինի, սակայն նշում է, որ ինքնաթիռի «ժամանակավոր օգտագործումը» քննարկվում է երկու երկրների միջև։ CBS News-ի տվյալներով՝ ինքնաթիռը կնվիրաբերվի Թրամփի նախագահական գրադարանին՝ նրա պաշտոնավարման ավարտին։
Այս տեղեկատվությունը տարածվում է Դոնալդ Թրամփի՝ այս շաբաթ Կատար կատարելիք այցից առաջ, որը Սպիտակ տուն վերադառնալուց հետո նրա առաջին արտասահմանյան շրջագայությունն է։
ԱՄՆ-ում Կատարի կառավարության խոսնակ Ալի Ալ-Անսարին հայտարարել է, որ Կատարի պաշտպանության նախարարության և Պենտագոնի միջև բանակցություններ են ընթանում։
«Այս հարցը քննարկվում է համապատասխան իրավաբանական ծառայությունների կողմից, դեռևս որոշում չի կայացվել»,- ասել է նա։
Աղբյուրները CBS News-ին հայտնել են, որ ինքնաթիռը փոխանցումից անմիջապես հետո պատրաստ չի լինի նախագահի կողմից օգտագործման, քանի որ այն պետք է համալրվի անվտանգության համակարգերով։ Այս գործարքը, հաշվի առնելով ինքնաթիռի պոտենցիալ արժեքը (լրատվամիջոցները գրում են, որ այն կարող է հասնել 400 միլիոն դոլարի՝ առանց վերազինման ծախսերի), անկասկած կառաջացնի իրավական և էթիկական հարցեր։
Կիրակի Սպիտակ տան մամուլի քարտուղար Քերոլայն Լևիթը հայտարարել էր, որ «օտարերկրյա կառավարությունից ստացված ցանկացած նվեր միշտ ընդունվում է բոլոր օրենքների լիարժեք պահպանմամբ», և որ Թրամփի վարչակազմը ձգտում է լիակատար թափանցիկության»։
Ներկայում ԱՄՆ նախագահն օգտագործում է երկու Air Force One ինքնաթիռ․ դրանք Boeing 747-200B ինքնաթիռներ են, որոնք հագեցած են հատուկ սարքավորումներով։ Դրանք գործում են 1990-ականների սկզբից։
Կատարը կարող է նվիրաբերել Boeing 747-8 ինքնաթիռի ավելի նոր մոդել, որը, ըստ ABC News-ի, արդիականացումից հետո վերածվել է «թռչող պալատի»։
Boeing-ը Սպիտակ տանը նոր ինքնաթիռներ մատակարարելու պայմանագիր ունի, սակայն Թրամփն այս տարվա սկզբին բողոքել էր, որ արտադրողը հետ է մնացել ժամանակացույցից։ Նրա վարչակազմը բանակցություններ է վարել երկու 747-8 ինքնաթիռների համար իր առաջին ժամկետի ընթացքում։ Հաղորդվել էր, որ դրանք պատրաստ չեն լինի մինչև 2027 կամ 2028 թվականը։
«Ես գոհ չեմ Boeing-ից։ Նրանց երկար ժամանակ է պետք Air Force One-ը պատրաստելու համար, մենք այդ պայմանագիրը վաղուց ենք տվել»,-փետրվարին ասել էր Թրամփը։
Կատարը նախկինում ինքնաթիռներ նվիրել է այլ երկրների, օրինակ՝ 2018 թվականին Թուրքիային։
Թարգմանությունը՝ Էմմա Չոբանյանի
