Տնային կենդանիների համար սահմանված տուրքը չվճարելու դեպքում քաղաքացիները չեն տուգանվի. ՏԵՍԱՆՅՈՒԹ

Օրերս հանրության շրջանում մեծ հնչեղություն ստացավ տնային կենդանիներ պահելու համար սահմանված տուրքը: Թեև այս օրենքն ընդունվել է դեռևս 2016թ-ին, բայց քաղաքացիներից շատերը դրա մասին տեղեկացան Արաբկիրի թաղապետարանի ծանուցումներից։

Տնային կենդանի պահելու տեղական տուրք սահմանելու պահանջն ամրագրված է «Տեղական տուրքերի և վճարների մասին» ՀՀ օրենքում, օրացուցային տարվա համար` յուրաքանչյուր տնային կենդանի պահելու դեպքում տուրքի չափ է սահմանվում 5000 դրամը։ Օրենքը գործող խմբագրմամբ ընդունվել է  2016 թվականին։ Ընտանի կենդանիներ պահելու համար սահմանված տուրքը վերահաստատվել է 2018թ-ի դեկտեմբերի 25-ին:

«Փրո Փոուզ» կենդանապաշտպան կազմակերպության հայաստանյան ներկայացուցիչ Նարե Արամյանի դիտարկմամբ՝ մենք կենդանիների նկատմամբ չունենք պատասխանատու վերաբերմունք, և ոլորտն ընդհանրապես օրենսդրորեն չի կարգավորվում։

Նարե Արամյանի խոսքով՝ կենդանապաշտպանների և Երևանի քաղաքապետարանի պատկերացումներն այս հարցում  շատ չեն տարբերվում՝  կարևորվում են  և բնակչության, և ընտանի կենդանիների շահերը։

«Այնուամենայնիվ, 2019-ին բացարձակապես ամբողջ Երևանի տարածքի համար պետք է լինի պարտադիր և որքան հնարավոր է ինտենսիվ»,- նշեց նա։

«Դինգո» թիմի հիմնադիր, Երևանի ավագանու անդամ Օվսաննա Հովսեփյանի խոսքով՝ սխալ ինֆորմացիայի արդյունքում թյուր տպավորություն է ստեղծվել։ Անցյալ տարվա տվյալներով երկուսուկես մլն դրամ տուրք է հարկվել, այսինքն՝ մոտավորապես 500 կենդանու համար փաստացի 500 մարդ վճարել է 5000 դրամ տուրք։

«Այս տարի ընդամենը 2 ծանուցում է ուղարկվել, դրանցից մեկը բողոքի արդյունքում, որ տանը շատ կենդանիներ են պահում: Մի մարդէլ ինքն է ցանկացել վճարել այդ 5000 դրամ տուրքը»,- ասաց բանախոսը։

Անդրադառնալով այդ ծանուցումների արդյունքում ծագած հանրային աղմուկին ՝ նա նշեց, որ  բողոքներ չեն լինի, եթե տեսնեն, որ այդ գումարներով լուծվում են կենդանիների խնդիրները։

Factor.am-ը թեմայի շուրջ զրուցեց նաև Երևանի քաղաքապետի մամուլի խոսնակ Հակոբ Կարապետյանի հետ, որը  պարզաբանեց. «Քաղաքապետարանում դեռ դեկտեմբերից քննարկումներ են ընթանում առհասարակ քաղաքում մարդկանց և կենդանիների համակեցության կանոնների վերանայման համընդգրկուն փաթեթ ստեղծելու շուրջ։ Դա վերաբերում է ինչպես տնային կենդանիներին, այնպես էլ անտուն կենդանիներին»։

Մանրամասները՝ տեսանյութում։

Անի Մնացականյան