Դեֆոլտի ռիսկը կա, բայց փոքր հավանականությամբ․ Վահագն Խաչատրյան. ՏԵՍԱՆՅՈՒԹ

Factor.am-ի հարցազրույցը  տնտեսագետ, ՀԱԿ վարչության անդամ Վահագն Խաչատրյանի հետ:

– Պարոն Խաչատրյան, ինչպե՞ս եք գնահատում ընտրություններից հետո ստեղծված իրավիճակը: Նախկին իշխանություններն անգամ նվազագույն անցողիկ շեմը չհաղթահարեցին, խորհրդարան անցան համեմատաբար նոր ուժեր:

– Կարծում եմ՝ սա ապրիլյան իրադարձությունների վերջակետն էր, և եթե սա ավելի վաղ տեղի ունենար, մեր պետության համար շատ ավելի լավ կլիներ: Պետք է հույս ունենալ, որ ստեղծված իրավիճակում խորհրդարանը կարող է իրականացնել այն բոլոր երազանքները, որոնց մասին մենք միշտ խոսել ենք:

– ՀԱԿ-ը ինչո՞ւ չմասնակցեց արտահերթ խորհրդարանական ընտրություններին: Եվ դրա համար որևէ բացատրություն չտրվեց:

– Չմասնակցելը ճիշտ էր, պետք էր չխանգարել այն մարդկանց, ովքեր սկսել էին իշխանափոխության գործընթացը, մեր և հեղափոխական ուժերի ձայները մեկտեղվելու էին: Մենք նախկին իշխանությունների դեմ պայքարել էինք նույն գաղափարներով՝ կոռուպցիա, տնտեսական մրցակցության բացակայություն և այլն: Մենք սատարելու ենք գործող իշխանություններին, որ Հայաստանում վերականգնվի սահմանադրական կարգը: Սրա մասին խոսվում էր դեռևս 1998 թվականից, երբ Ռոբերտ Քոչարյանն անօրինական կերպով դարձավ երկրի առաջին դեմքը:

– Ինչպե՞ս եք գնահատում Ռոբերտ Քոչարյանի շուրջ ծավալվող գործընթացները՝ հարուցված քրեական գործը, կալանավորումը:

– Այդպես էլ պետք է լիներ: Բոլորն էլ՝ հատկապես Ռոբերտ Քոչարյանը, և այդ օրերին կառավարման համակարգում գտնվող բարձրաստիճան պաշտոնյաները լավ գիտեն, որ տեղի է ունեցել սահմանադրական կարգի տապալում: Եթե ուշադիր կարդաք այդ օրերին միջազգային կառույցների հաշվետվությունները, ի վերջո՝ «Վիքիլիքսի» բացահայտումները, կտեսնեք, որ այդ ձևակերպումը համապատասխանում է Ռոբերտ Քոչարյանի կատարած գործողություններին: Իմիջայլոց, առաջին անգամը չէ, որ նա սահմանադրական կարգ է խախտում: 1998թ. նա, լինելով երկրի նախագահ, ԱԺ արտահերթ նստաշրջան պետք է հրավիրեր, չկատարեց այդ պարտականությունը: Երկրի ղեկավարներին դատում են նաև այն բանի համար, որ իրենց պարտականությունները չեն կատարում: Ռոբերտ Քոչարյանն օրենքը շրջանցելու հակում ուներ:

– ՀԱԿ-ը, մասնավորապես՝ առաջին նախագահ Լևոն Տեր-Պետրոսյանը, մի քանի տարի առաջ հայտարարել էր, թե Հայաստանում դեֆոլտի վտանգ կա: Հիմա նույնպե՞ս կա դրա վտանգը:

– Այդ ռիսկը կա, բայց իրականություն դառնալու հավանականությունը շատ քիչ եմ համարում:

– 2020 թվականին պետական պարտքի մարման ու սպասարկման համար բավականին մեծ գումար պետք է հատկացվի…

– Բավականին մեծ գումարը կազմում է 900 մլն դոլար, դա բյուջեի մեկ երրորդ մասն է կազմում, այդ առումով գործող իշխանությունների վրա ծանր բեռ կա: Եվ այն հարցը, թե ինչո՞ւ աշխատավարձերը կամ նպաստները չեն բարձրացնում, պարզապես դա չեն կարող անել: Այս բյուջեն իրականում նախկին բյուջեի իներցիոն շարունակությունն է:

– Նախկին իշխանությունները հակադարձում են, թե թող հեղափոխական, և ոչ թե իներցիոն բյուջե բերեին:

– Նախկին իշխանությունների հակադարձումերն ինձ համար փաստարկ չեն: Նրանք նախ թող պատասխանեն, թե ինչու են երկիրը հասցրել այսպիսի վիճակի:

– Հնարավո՞ր է դրամն արժեզրկվի: 1 դոլարի համար 480-485 դրամը համարժե՞ք փոխարժեք է:

– Նույնիսկ եթե համարժեք չէ, մի մոռացեք մեր կախվածությունը ներմուծումից: Մենք ուզում ենք, որ ներդրումներ լինեն, տնտեսական աճ լինի, և եթե մեզ ներդրումային գրավչություն է անհրաժեշտ, պետք է դրամավարկային քաղաքականությունն իրականացնել այդ շրջանակներում։ Այսինքն՝ այն դասական մոտեցումը, որ պետք է արժեզրկել արժույթը, որպեսզի արտաքին առևտրում մենք մրցակցային առավելություն ստանանք, այսօրվա տնտեսական մոտեցումների, մոդելների համար միանշանակ չէ:

Հարցազրույցի մանրամասները՝ տեսանյութում

Արմինե Ավետյան