Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ

Ֆուտբոլի Հայաստանի չեմպիոն «Արարատ-Արմենիան» չորրորդ անընդմեջ պարտությունը կրեց Եվրոպա լիգայի հիմնական փուլում:

Չորրորդ տուրում երևանյան ակումբը մրցակցի խաղադաշտում 2:3 հաշվով պարտվեց Պորտուգալիայի գավաթակիր «Տորենսեին», որը հանդես է գալիս երկրի երկրորդ լիգայում (տեսանյութ): Մինչև ավելացված ժամանակի երրորդ րոպեն հյուրերն առջևում էին հաշվի մեջ, սակայն ցավալի պարտություն կրեցին։

Հանդիպման հաշիվը 13-րդ րոպեին բացեց «Տորենսեի» կուբացի հարձակվող Ժորժե Ագիրեն, որը 12 րոպե անց կարմիր քարտ ստացավ կոպիտ խախտման համար։

Քանակական առավելություն ստացած «Արարատ-Արմենիան» առաջին խաղակեսի վերջնամասում հավասարեցրեց հաշիվը։ 41-րդ րոպեին աչքի ընկավ թիմի ավագ Կարեն Մուրադյանը։

58-րդ րոպեին երևանյան ակումբին հաշվի մեջ առաջ մղեց մոզամբիկցի պաշտպան Բրունո Վիլսոնը։

76-րդ րոպեին վերջին հույսի խախտման համար խաղադաշտից հեռացվեց «Արարատ-Արմենիայի» բրազիլացի դարպասապահ Ժոաո Բրավիմը։

Վերջնամասում դաշտի տերերը մեծ ճնշում էին գործադրում Հայաստանի չեմպիոնի դարպասին և կարողացան հասնել հաղթանակի։ «Տորենսեն» երկու գոլ խփեց ավելացված ժամանակում։

Հիշեցնենք, որ նախորդ երեք տուրերում «Արարատ-Արմենիան» պարտվել էր չեխական «Սպարտա Պրահային» (1:4), լեհական «Յագելոնիային» (1:3), նիդերլանդական «ԱԶ Ալկմարին» (0:4) և առանց միավորի եզրափակում է մրցաշարային աղյուսակը։ 

Մանուել Տուլիպայի գլխավորած թիմը Եվրոպա լիգայում հաջորդ հանդիպումը կանցկացնի նոյեմբերի 26-ին՝ հյուրընկալվելով ավստրիական «Զալցբուրգին»: Լիգայի փուլում երևանյան ակումբը մրցելու է նաև նիդերլանդական «ՆԵԿ Նեյմեգենի» (դեկտեմբերի 10), սլովենական «Ցելյեի» (հունվարի 21) ու իտալական «Միլանի» (հունվարի 28) հետ:

Եվրոպա լիգա, չորրորդ տուր

«Տորենսե» (Պորտուգալիա) – «Արարատ-Արմենիա» (Հայաստան) ՝ 3:2

 Ժորժե Ագիրե, 13, Խավի Վասկես, 90+3, Մուսա Դրամե, 90+5 – Կարեն Մուրադյան, 41, Բրունո Վիլսոն, 58

Հեռացումներ` Ժորժե Ագիրե, 25 («Տորենսե») – Ժոաո Բրավիմ, 76 («Արարատ-Արմենիա»)

Դավիթ Եղիազարյան