04.11.2026 | 21:47
Ինչ են քննարկել Արման Սարոյանը և ՔՊ-ականները. ԱԺ-ում փակ հանդիպում է եղել. ՏԵՍԱՆՅՈՒԹ
Արմեն Սարգսյանը մասնակցել է Չարլզ 3-րդի կազմակերպած ԱԲ-ի վերաբերյալ հանդիպմանը. ՏԵՍԱՆՅՈՒԹ
Հաղորդաշարեր
18.09.2026 | 17:38
Մեծ Բրիտանիայի թագավոր Չարլզ 3-րը Շոտլանդիայում Դամֆրիս Հաուսում մեկտեղել է արհեստական բանականության ոլորտի ղեկավարներին, կառավարության ներկայացուցիչների և քաղաքացիական հասարակության առաջատար ներկայացուցիչներին՝ քննարկելու արհեստական բանականության տեխնոլոգիաների հետագա կիրառումն ու զարգացումը։ Հանդիպման հիմնական նպատակն էր՝ քննարկել արհեստական բանականությունն այնպիսի եղանակներով կիրառելու հնարավորությունները, որից կշահի հասարակությունը, կամրապնդվեն տեղական համայնքները և կբարելավվի մարդկանց կյանքը։
The Ditchley Foundation-ի աջակցությամբ անցկացված քննարկումներին մասնակցել են խոշոր տեխնոլոգիական ընկերությունների ներկայացուցիչներ, այդ թվում՝ Nvidia-ից, Google DeepMind-ից, OpenAI-ից և Anthropic-ից։
Բրիտանական թագավորական պալատի հրապարակած լուսանկարներից պարզ է դառնում, որ հանդիպմանը մասնակցել է նաև ՀՀ նախկին նախագահ Արմեն Սարգսյանը։
Գագաթնաժողովի մասնակիցները քննարկել են հարցը՝ արդյո՞ք հնարավոր է ձևավորել ընդհանուր սկզբունքների միասնական շրջանակ՝ արհեստական բանականության հետագա կիրառումն ուղղորդելու համար։ Նախատեսվող շրջանակի նպատակն է տեխնոլոգիան դիտարկել ոչ միայն որպես կարողությունների և արդյունավետության բարձրացման միջոց, այլև որպես մարդկային արժանապատվությունը պահպանող և թե՛ մարդկանց, թե՛ մոլորակի բարեկեցությանը նպաստող գործիք։
Իր ելույթում Մեծ Բրիտանիայի միապետն անդրադարձել է այս հեղափոխական նոր տեխնոլոգիայի ընձեռած հնարավորություններին և հնարավոր ռիսկերին։
«Ես կարող եմ միայն ողջունել ձեզանից նրանց, ովքեր այդքան նվիրված են արհեստական բանականությունը բարի նպատակներով օգտագործելուն, որպեսզի մենք կարողանանք տեսնել մի ապագա, որտեղ մարդկային ներուժը կմնա անսահման, իսկ տեխնոլոգիական զարգացումը խնամքով կուղղորդվի՝ մեր հաջողություններին նպաստելու համար»,- ընդգծել է նա։
Թեև արհեստական բանականությունը պատմության մեջ ամենաարագ տարածում գտած տեխնոլոգիաներից մեկն է, դրա արագ զարգացումը շարունակում է նոր մարտահրավերներ առաջացնել։ Գագաթնաժողովի նպատակն էր՝ առաջ մղել էթիկական սկզբունքները, որոնց ապագայում կարող են միասնականորեն աջակցել ոլորտի փորձագետներն ու ղեկավարները։
Թարգմանությունը՝ Էմմա Չոբանյանի
