Ռուսական «Կրասնոդարի» պաշտպան Լուկաս Օլասան անդրադարձել է իր ակումբակից Էդուարդ Սպերցյանին, որն արդյունավետ խաղ է ցուցադրում Սաուդյան Արաբիայի բրոնզե մեդալակիր «Ալ Ահլիի» կազմում: Հայաստանի ազգային հավաքականի ավագն «Ալ Ահլիի» կազմում անցկացրած 5 պաշտոնական խաղում դարձել է 2 գոլի ու 4 գոլային փոխանցման հեղինակ:
«Տեսել եմ, որ Սպերցյանը, մի քանի խաղ անցկացնելով նոր առաջնությունում, արդեն մի շարք գոլային գործողություններ է կատարել: Էդիկն այնպիսի խաղացող ու անձնավորություն է, որն արժանի է սաուդյան լիգայում դառնալ այնպիսի աստղ, ինչպիսին Ռուսաստանի Պրեմիեր լիգայում էր: Լավագույնն եմ մաղթում նրան: Սպերցյանն ավելի մեծ օգուտ է տալիս «Ալ Ահլիին», քան Ռոնալդուն՝ «Ալ Նասրին»,- ուրուգվայցի ֆուտբոլիստի խոսքը մեջբերում է Sovsport.ru-ն:
Հիշեցնենք, որ 26-ամյա կիսապաշտպանն այս ամռանն է «Կրասնոդարից» տեղափոխվել «Ալ Ահլի», որի հետ կնքել է 4 տարվա պայմանագիր։ Էդուարդ Սպերցյանը «Կրասնոդարի» սան է, գլխավոր թիմում անցկացրել է 185 հանդիպում, դարձել 58 գոլի ու 44 գոլային փոխանցման հեղինակ։
