31.08.2026 | 19:13
Սամվել Գրիգորյանը նշանակվել է 3-րդ բանակային կորպուսի հրամանատար
Հյուսիսային Կիպրոսի ափերի մոտ խորտակված լաստանավում Ադրբեջանի քաղաքացիներ են եղել
Քաղաքականություն
31.08.2026 | 18:43
Ինքնահռչակ Հյուսիսային Կիպրոսի Թուրքական Հանրապետության ափերի մոտ շրջված FİLOJET լաստանավի անձնակազմի կազմում ընդգրկված Ադրբեջանի քաղաքացիներ Վալեհ Գումմաթովը և Ռաշադ Իբրահիմովը փրկվել են։ Այս մասին Azertac-ին հայտնել է Ադրբեջան-Կիպրոս բարեկամության ընկերության ղեկավար Օրհան Հասանօղլուն։
Նրա խոսքով՝ անձամբ է կապ հաստատել այն հիվանդանոցի հետ, ուր տեղափոխվել էին Ադրբեջանի քաղաքացիները։ Առաջին բուժօգնություն ստանալուց հետո տղամարդիկ դուրս են գրվել հիվանդանոցից, նրանց առողջական վիճակը մտահոգության տեղիք չի տալիս։ Հասանօղլուն նաև ցավակցություն է հայտնել զոհվածների ընտանիքներին և տուժածներին։
Ավելի ուշ նա ադրբեջանական APA-ին հայտնել է, որ Ադրբեջանի ևս երկու քաղաքացիներ լաստանավի ուղևորներ են եղել․ նրանք նույնպես փրկվել են։
Ավելի վաղ հաղորդվել էր, որ Կիրենիայից (թուրքերեն տարբերակը՝ Գիրնե) դեպի Թուրքիայի Թաշուջու նավահանգիստ ուղևորվող լաստանավն ափից 2,5 կիլոմետր հեռավորության վրա շրջվել է։ Լաստանավում եղել է 279 մարդ։
Հյուսիսային Կիպրոսի տրանսպորտի նախարար Էրհան Արիկլիի տեղեկացմամբ՝ նավը ամբողջությամբ ջրի տակ է անցել և գտնվում է 514 մետր խորության վրա։ Նավի հետ կապը կորել էր նավահանգստից դուրս գալուց 35 րոպե անց։ Պատահարի հետևանքով 8 մարդ զոհվել է, 242-ը՝ փրկվել։
Թարգմանությունը՝ Էմմա Չոբանյանի
