Հարսանիքի հուշամեդալներ են առգրավել. խուզարկության որոշումը երեկ է տրվել. փաստաբան․ ՏԵՍԱՆՅՈՒԹ

Լևոն Քոչարյանի բնակարանում իրականացված խուզարկության վերաբերյալ փաստաբան Տաթևիկ Սողոյանը հայտարարեց, որ գործողության ժամանակագրությունն իր համար քաղաքական հետապնդման մասին խոսելու հիմք է տալիս։

Սողոյանի խոսքով՝ քննիչը խուզարկություն իրականացնելու միջնորդությունը դատարան ներկայացրել է հենց նախորդ օրը՝ Լևոն Քոչարյանի ելույթից հետո։

«Շատ պատահական «զուգադիպություն» է, որ քննիչը որոշել է միջնորդությունը հայցել դատարանից խուզարկություն իրականացնել հենց երեկ։ Ժամը չենք կարող տեսնել, բայց ինչ-որ մի բան ինձ հուշում է, որ դա տեղի է ունեցել հենց Լևոն Քոչարյանի ելույթից հետո։ Սա ինքնին արդեն ծանրակշիռ փաստ է քաղաքական հետապնդումը հիմնավորելու»,- նշեց փաստաբանը։

Սողոյանի խոսքով՝ խուզարկությունն իր բնույթով նաև «պատժիչ-ռեպրեսիվ» գործողություն է եղել՝ հատկապես հաշվի առնելով, որ տանը եղել են Քոչարյանի անչափահաս երեխաները։

«Երեխաները շփոթված էին։ Պատկերացրեք՝ դուռը Ռոբերտ Քոչարյան կրտսերն է բացել ու սենց ասում էր՝ «էս ի՞նչ են անում էս մարդիկ էստեղ»։ Լևոնի կինն էլ փորձում էր փոքրիկին բացատրել, որ չգիտեմ՝ հնարավոր է Սպայդերմենն է եկել»,– պատմեց նա։

Փաստաբանը հատկապես չարդարացված է համարում ԱԱԾ «Ալֆա» ջոկատի ներկայությունը բնակարանում։ Նրա խոսքով՝ նույնիսկ երեխան է հարցրել, թե ինչու են նման ջոկատայինները եկել իրենց տուն, քանի որ իր պատկերացմամբ՝ այդպիսի ստորաբաժանումները պետք է գնան ահաբեկիչների կամ զինված մարդկանց մոտ։ Սողոյանը նշեց, որ վարույթն իրականացնող մարմինը պնդել է, թե «Ալֆա»-ի ներկայացուցիչները գործողությանը չեն մասնակցել, սակայն, նրա գնահատմամբ, դիմակավորված անձանց ներկայությունն ինքնին ազդեցություն է թողնում երեխաների, բնակիչների և հարևանների վրա և չի կարող իրավաչափորեն հիմնավորվել։ Անդրադառնալով հարցին, թե ինչ կապ ունի Լևոն Քոչարյանը գործի հետ, եթե այն վերաբերում է Ռոբերտ Քոչարյանին, Սողոյանը նշեց, որ իրավապահները փորձել են իրավական շղթա կառուցել անցյալի հնարավոր գործողությունների և Լևոն Քոչարյանի բնակարանի միջև։

«Վստահ եմ, որ եթե անաչառ դատարան լինի, էս խուզարկության որոշումը բացարձակ ապօրինի է ճանաչվելու»,- հայտարարեց նա։

Փաստաբանի ներկայացմամբ՝ տրամաբանությունն այն է, որ մոտ 20-25 տարի առաջ կատարված ենթադրյալ գործողությունների արդյունքում ձևավորված ապօրինի գույքը տարիների ընթացքում փոխակերպվել է և ի վերջո հասել է Լևոն Քոչարյանի բնակարան։ Սակայն, նրա խոսքով, խուզարկության ընթացքում այդպիսի գույք չի հայտնաբերվել։ Սողոյանը պատմեց, որ իրավապահներն անգամ սպասքի հետևի տարբերանշաններն են ուսումնասիրել՝ փորձելով պարզել՝ արդյոք բնակարանում կան թանկարժեք իրեր։

«Իմ տպավորությունն այնպիսին էր, որ ցանկանում են գերթանկարժեք բաներ գտնել, որոնք այդպես էլ չկարողացան գտնել»,- ասաց Սողոյանը։

Նրա խոսքով՝ խուզարկության ընթացքում առգրավվել են նաև Լևոն Քոչարյանի հարսանիքին նվիրած հուշամեդալներ։ Սողոյանը նշեց, որ իրավապահները վերցրել են տարբեր կրիչներ, այդ թվում՝ սմարթ հեռուստացույցի ֆլեշ կրիչ։

Մանրամասները` տեսանյութում:

Արփի Հակոբյան