Ես չեմ նահանջելու, արմատախիլ ենք անելու քրեական ենթամշակույթը. Պապիկյան․ ՏԵՍԱՆՅՈՒԹ

Պաշտպանության նախարար Սուրեն Պապիկյանը լրագրողների հետ ճեպազրույցում նշեց, թե իր համար նորություն է, որ մահերի համար կարելի է անմիջականորեն մեղադրել պաշտպանության նախարարին։

«Սա մարտահրավեր է, որ միայն իմը չի։ Ու անկախ նրանից՝ պաշտպանության նախարարը կլինեմ ես, թե այլ մարդ, սրան պետք է համակարգային մոտեցում»,– ասաց Պապիկյանը։

Հարցին` արդյոք իրեն պատասխանատու է համարում բանակում տեղի ունեցողի համար, նախարարը պատասխանեց, որ որպես պաշտպանության նախարար ունի իր պատասխանատվության մասնաբաժինը։

Պապիկյանի խոսքով՝ բանակում առկա քրեական ենթամշակույթը և ոչ կանոնադրային հարաբերությունները խնդիրներ են, որոնց դեմ պետք է պայքարել համակարգային մակարդակով։

«Ես պատասխանատու եմ, որ դա արմատախիլ անենք։ Ու ես չեմ նահանջելու, գնալու եմ դրանք արմատախիլ անելու հետևից։ Ամեն օր»,- ընդգծեց նա։

Պապիկյանն ասաց, որ զորամասեր այցելում է ոչ միայն տեսախցիկների առջև, սակայն վերջին շրջանում որոշել է ավելի ակտիվորեն հրապարակել իր աշխատանքը։

Նրա խոսքով՝ երբ նախարարությունը փակ է աշխատում, քննադատվում է դրա համար, իսկ երբ աշխատանքը հրապարակային է դառնում, հարց է առաջանում, թե ինչու են ամեն ինչ նկարահանում։

«Կա´մ պիտի լուսաբանենք մեր աշխատանքը, կա´մ պիտի շարունակենք աշխատել փակ, բայց հարցեր պիտի չառաջանան»,- նշեց նախարարը:

Պապիկյանն ընդգծեց, որ այցերի ընթացքում տեղեկություններ է ստանում, որոնք, իր խոսքով, չի կարող ստանալ միայն զեկույցների միջոցով։

Նշենք, որ ճեպազրույցի ընթացքում հայտնի դարձավ, որ բանակում խաղաղ պայմաններում մահվան հերթական դեպքն է արձանագրվել: Ըստ ՊՆ-ի պաշտոնական մեկնաբանության` նախնական տվյալներով 37-ամյա ծառայողը մահացել է ծառայության հետ առնչություն չունեցող պատճառներով:

Սա այս տարվա ընթացքում բանակում մահվան 14-րդ դեպքն է:

Մանրամասները՝ տեսանյութում։

Արփի Հակոբյան