05.09.2026 | 11:03
Վթարային ջրանջատում 3 մարզերում
«Սրիկայաբար փորձում եք շահարկել», «Ձեզ դուրս են շպրտելու ԱԺ շենքից»․ վիճաբանություն խորհրդարանում. ՏԵՍԱՆՅՈՒԹ
13.08.2026 | 16:02
Ազգային ժողովում տեղի ունեցած հանձնաժողովի նախագահի ընտրությունը վերածվեց թեժ բախման և փոխադարձ վիրավորանքների։
«Ուժեղ Հայաստան» խմբակցության անդամ Էդգար Ղազարյանն անդրադարձավ Նիկոլ Փաշինյանի անցյալի հայտարարություններին և բանակցային գործընթացի տապալմանը։ Նա հայտարարեց, որ Փաշինյանը միակողմանիորեն դուրս է եկել ԵԱՀԿ Մինսկի խմբի ձևաչափից, ինչը հանգեցրել է պատերազմի։
«Ժամանակին իշխանական գործիչների հետ ստվերային պայմանավորվածություններով մի լրագրող դարձավ «ականավոր զորավար»,- ասաց Ղազարյանը՝ հավելելով, որ պաշտոնական բանակցությունների փոխարեն տեղի են ունեցել հատուկ ծառայությունների կասկածելի հանդիպումներ Դուբայում։
Ղազարյանը քննադատության ենթարկեց իշխանություններին պատերազմի հետևանքով կրած ահռելի կորուստների համար։ Նրա խոսքով՝ մինչ հարյուր հազարավոր մարդիկ տնավեր են դարձել, իշխանավորները զբաղված են եղել իրենք իրենց պարգևատրելով․ «Դրա դիմաց ի՞նչ են ստացել այս ամենի հեղինակները․ պարգևավճարներ… ձեռք են բերել տներ, առանձնատներ՝ տնավեր դարձնելով հարյուր հազարավոր մարդկանց»։
Ղազարյանը խոսեց իր քեռու թոռան՝ Աղաջան Ջանոյանի մասին, ով զոհվել է պատերազմում։ Նա մեղադրեց իշխանություններին զոհերի թեման շահարկելու մեջ․ «Մենք լավ կլինեինք, եթե Աղաջան Ջանոյանը դառնար իր երազանքի ռազմական բժիշկը և փրկեր մեր զինվորների կյանքը, որը դուք սրիկայաբար փորձում եք շահարկել այստեղ»։
Նիստը վարող Հայկ Կոնջորյանի կոշտ արձագանքեց Ղազարյանի ելույթին։ Վերջինս նախազգուշացում հայտարարեց Ղազարյանին։
«Եթե դուք չինքնաէվակուացվեք այս դահլիճից, ձեզ էվակուացնելու են և դուրս են շպրտելու այս դահլիճից և Ազգային ժողովի շենքից»,- հայտարարեց նիստը վարողը։
«Քաղաքացիական պայմանագիր» խմբակցության պատգամավորները «հարցերը պարզելու» համար լքեցին դահլիճը, ինչից հետո հայտարարվեց 20 րոպե ընդմիջում։
Մանրամասները՝ տեսանյութում։
Եվգենյա Համբարձումյան
