Մեզ այդպիսի տեղեկություն հայտնի չէ․ ՀՀ ԱԳՆ խոսնակը՝ ԵՄ-ի միգրանտներին ՀՀ ուղարկելու առաջարկի մասին

Հայաստանի ԱԳՆ-ին հայտնի չէ տեղեկություն, որ ԵՄ-ում, հնարավոր է, քննարկում են ապօրինի ներգաղթյալներին Հայաստան և մի քանի այլ երկրներ տեղափոխելու հարցը։ Այս մասին Factor TV-ին հայտնել է ՀՀ ԱԳՆ խոսնակ Անի Բադալյանը։

Տեղեկությունը տարածել էր իտալական Corriere della Sera լրատվականը։ Հրապարակման համաձայն՝ Հայաստանը և մի քանի այլ երկրներ դիտարկվելու են որպես ուղղություն՝ ապօրինաբար ԵՄ-ում հայտնված միգրանտներին տեղափոխելու համար։

Ըստ նույն հաղորդման՝ Եվրամիության ներքին գործերի նախարարներն այսօր ոչ պաշտոնական քննարկում են ունենալու Իսպանիայի Սեուտա էքսկլավում մարոկկացի միգրանտների հարցով, և հենց այդ քննարկմանը Իտալիայի ՆԳ նախարարը ներկայացնելու է առաջարկ՝ «ալբանական տարբերակով» նաև այլ երկրներում ապօրինի ներգաղթյալների հայրենադարձման կենտրոններ ստեղծելու համար։

Հայաստանից բացի, որպես հավանական ուղղություններ են դիտարկվում նաև աֆրիկյան մի քանի երկրներ՝ Ռուանդան, Գանան, Սենեգալը, Թունիսը, Լիբիան, Մավրիտանիան, Եգիպտոսը, Ուգանդան, Եթովպիան, ինչպես նաև Ուզբեկստանը և Մոնտենեգրոն։

ԵՄ անդամ պետությունների ՆԳ նախարարների ոչ պաշտոնական հանդիպման մասին ծանուցման օրակարգում այս առաջարկի մասին տեղեկություններ չեն նշվում։

Նշենք, որ նմանատիպ հրապարակում եղել էր նաև 2024 թվականին։ Այն ժամանակ նշվում էր, որ Հայաստանը դիտարկվում է որպես հնարավոր ուղղություն՝ Միացյալ Թագավորությունում հայտնված ապօրինի ներգաղթյալների հայրենադարձման համար։ Այն ժամանակ էլ ՀՀ ԱԳՆ-ից հայտնել էին, որ Հայաստանն ու Միացյալ Թագավորությունը նման թեմայով բանակցություններ չեն ունեցել։

Գարիկ Հարությունյան