Կաթողիկոսը կարող էր գալ, դեմը ոչ մեկ չէր կարող առնել. Կնյազ Հասանովը` Վարդևանյանին․ ՏԵՍԱՆՅՈւԹ

Իններորդ գումարման Ազգային ժողովի առաջին նստաշրջանի մեկնարկին պատգամավոր Արամ Վարդևանյանը հանդես է եկել հարցադրմամբ՝ կապված Ամենայն Հայոց Կաթողիկոսի բացակայության հետ:

Արամ Վարդևանյանը նշել է, որ առաջին նստաշրջանի բացման առթիվ ողջույնի ելույթի իրավունք ունեն թե՛ Հանրապետության նախագահը, թե՛ Ամենայն Հայոց Կաթողիկոսը: Պատգամավորը դիմել է նիստը նախագահող տարիքով ավագ պատգամավոր Կնյազ Հասանովին՝ խնդրելով պարզաբանել, թե ինչու չի իրացվել Վեհափառ Հայրապետի ելույթի իրավունքը, հատկապես, երբ նախորդ գումարումների ժամանակ նա ներկա է եղել նիստերին:

Ի պատասխան բարձրացված հարցի՝ Կնյազ Հասանովը հայտարարել է, որ որպես տարիքով ավագ պատգամավոր՝ նման պարզաբանում տալն իր իրավասությունների մեջ չի մտնում: Նա շեշտել է, որ Կաթողիկոսը կարող էր ներկայանալ, և դրա դեմն «ոչ մեկ չէր կարող առնել»: Հասանովը հավելել է, որ Ազգային ժողովի նախագահի ընտրությունից հետո պատգամավորները կարող են իրենց բոլոր հարցերով դիմել նորընտիր նախագահին:

Քննարկումից հետո նիստը նախագահողը ներկայացրել է առաջին նստաշրջանի օրակարգը, որը ներառում է հետևյալ հիմնական կետերը.

-Հաշվիչ հանձնախմբի ստեղծում,
-Ազգային ժողովի նախագահի ընտրություն,
-Ազգային ժողովի նախագահի երեք տեղակալների ընտրություններ,
-Մշտական հանձնաժողովների ստեղծում,
-Էթիկայի հանձնաժողովի ստեղծում,
-Մշտական հանձնաժողովների նախագահների ընտրություններ,
-Կառավարության կառուցվածքի փոփոխության վերաբերյալ օրենքի նախագծի քննարկում:

Մանրամասները՝ տեսանյութում։