ԱՄՆ Սենատը ՌԴ-ի դեմ պատժամիջոցների վերանայված նախագիծ է ներկայացրել, որը կարող է առնչվել նաև Ադրբեջանին

ԱՄՆ սենատորները հրապարակել են Ռուսաստանի դեմ պատժամիջոցների մասին օրինագծի թարմացված տարբերակը, որը պաշտպանել էր հանգուցյալ սենատոր Լինդսի Գրեհեմը, որը մեղմացնում է սկզբնական առաջարկի մեջ Չինաստանի, Հնդկաստանի և ռուսական նավթի ու գազի այլ ներմուծողների նկատմամբ մաքսատուրքերի սպառնալիքը, գրում է Reuters-ը։

Օրինագիծը, որը պաշտպանում են և՛ հանրապետական, և՛ դեմոկրատ սենատորները, ձգտում է պատժամիջոցներ կիրառել ռուս պաշտոնյաների նկատմամբ և մաքսատուրքերի միջոցով ճնշում գործադրել Չինաստանի և Հնդկաստանի վրա՝ նվազեցնելու այս երկրների կախվածությունը Ռուսաստանից որպես էներգակիրների մատակարար։

Անցյալ շաբաթ հանկարծամահ եղած Գրեհեմն ավելի վաղ հայտարարել էր, որ համաձայնության է եկել ​​նախագահ Դոնալդ Թրամփի հետ՝ օրինագծի քննարկումը շարունակելու համար, այն ներկայացվելուց ավելի քան մեկ տարի անց։ Սենատորի օգնականները նշել են, որ օրինագծի 26 համահեղինակ կար, և նրանք մի քանի ժամվա ընթացքում ակնկալում են ավելի շատերին՝ լավատեսություն հայտնելով դրա ընդունման հնարավորությունների վերաբերյալ։

«Մենք բավականին վստահ ենք դրա ուղու վրա»,- ասել է նրանցից մեկը։

Օրինագիծը փոփոխվել է Հարավային Կարոլինայից հանրապետական ​​Գրեհեմի և Կոնեկտիկուտից դեմոկրատ սենատոր Ռիչարդ Բլումենտալի կողմից 2025 թվականի ապրիլին ներկայացված սկզբնական տարբերակից։ Նոր տարբերակում ռուսական նավթի և բնական գազի երրորդ կողմի գնորդների համար կարող են կիրառվել մաքսատուրքեր՝ հինգ խոշորագույն գնորդների համար առավելագույնը 100%-ով՝ նախորդ առաջարկի համեմատ, որը նախատեսում էր 500%։ Այն նաև թույլ է տալիս բացառություն անել այն երկրների համար, որոնք ներմուծում են Ռուսաստանի բնական գազի արտահանման 15%-ից պակասը, և որոնք զգալի քայլեր են ձեռնարկում այդ ներմուծումը կրճատելու համար, ինչը կարող է բացառել Ճապոնիան, Ֆրանսիան, Հունգարիան և Բելգիան։

Ռուսական նավթի խոշորագույն հինգ գնորդներն են Չինաստանը, Հնդկաստանը, Սլովակիան, Հունգարիան և Ադրբեջանը, իսկ ռուսական բնական գազի խոշորագույն ներմուծողներն են Չինաստանը, Ֆրանսիան, Ճապոնիան, Հունգարիան և Բելգիան, ասել են օգնականները։

Միջոցառումը նաև պատժամիջոցներ է սահմանում Ռուսաստանի ստվերային նավատորմի լցանավերի նկատմամբ, որոնք կախված չեն արևմտյան ծովային ծառայություններից, ռուսական ֆինանսական հաստատությունների, այդ թվում՝ Ռուսաստանի Դաշնության Կենտրոնական բանկի, և Ռուսաստանի խոշորագույն պետական ​​էներգետիկ նախագծերի, այդ թվում՝ «Յամալ» հեղուկ բնական գազի (LNG) և «Արկտիկական LNG 1, 2 և 3»-ի նկատմամբ։

Բացի այդ, նոր տարբերակը ներառում է մի դրույթ, որը թույլ է տալիս Թրամփին չեղարկել պատժամիջոցները, եթե նա համարի, որ դա համապատասխանում է ԱՄՆ ազգային շահերին։

Հարցին՝ ինչպե՞ս են մեղմացվել սկզբնական օրինագծի որոշ դրույթներ, Սենատի օգնականներից մեկը մատնանշել է Թրամփի հետ համաձայնության հասնելու համար ամիսներ տևած բանակցությունները։

«Սա միակ ապրանքն է, որը ներկայում վայելում է բոլորի աջակցությունը, և, հավանաբար, միակ ապրանքն է, որը առաջ է շարժվելու և ճնշում է գործադրելու Ռուսաստանի վրա այնպես, ինչպես մենք բոլորս կցանկանայինք»,- ասել է նա։

Թրամփը, իր հերթին, լավատեսություն է հայտնել, որ օրինագիծը կընդունվի և կդառնա օրենք։

«Սա Լինդսիի պատվին է։ Սա նրա ոճն էր։ Նա սա ուզում էր ամեն ինչից շատ։ Դուք գիտեք, թե ինչպես էր նա զգում, և կա մեծ հավանականություն, որ դա կիրականացվի»,- ասել է Թրամփը։

Թարգմանությունը՝ Էմմա Չոբանյանի