Զախարովան հայտարարել է, թե ՌԴ-ն Հայաստանին բողոքի նոտա է հղել Գյումրիում հուշարձանի վանդալիզմի կապակցությամբ

Ռուսաստանը բողոքի նոտա է հղել Հայաստանին՝ Գյումրիում խորհրդային հուշարձանի վանդալիզի կապակցությամբ։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Սա պարզապես խուլիգանություն չէ, այլ մեր երկրների ընդհանուր պատմական հիշողության վրա ուղղված հարձակում և Մեծ Հաղթանակը չարաշահելու փորձ։ Մենք բողոքի նոտա ենք ուղարկել հայկական կողմին»,- ասել է նա։

Զախարովան նաև ասել է, թե ռուսական կողմը ծանոթացել է միջադեպի ենթադրյալ մեղավորի ձերբակալման մասին հաղորդագրություններին և հույս ունի, որ արդարադատությունը կհաղթի։ Միաժամանակ, նա Հայաստանի իշխանություններին մեղադրել է լռության մեջ։

«Զարմանալի է, որ Հայաստանի իշխանությունները, հուշարձանի պղծումը վճռականորեն դատապարտելու կամ գոնե հստակ դիրքորոշում հայտնելու փոխարեն, որոշել են լռել։ Սա ավանդույթ է դառնում»,- հայտարարել է ռուսաստանցի պաշտոնյան։

Ըստ նրա՝ նման թողտվությունը և Հայաստանում խորհրդարանական ընտրություններին ուղեկցող, իբր, «հակառուսական արշավը հող են ստեղծել նման բարբարոսական գործողությունների համար»։ Զախարովան նաև հայտարարել է, թե  Հայաստանի իշխանությունների հետ կապված տեղեկատվական ռեսուրսները, իբր, փորձում են Ռուսաստանին մեղադրել հուշարձանը ենթադրաբար պղծելու մեջ։

Ավելի վաղ Factor TV-ն գրել էր, որ Գյումրիի հուշահամալիրի վնասման հանցավոր արարքը ռուսական մեդիադաշտի մի հատվածում վերածվել է ոչ թե իրավական, այլ քաղաքական սյուժեի․ այն կապվել էր Հայաստանի իշխանությունների, Արևմուտքի ազդեցության, ռուսատյացության և «ուկրաինական սցենարի» հետ։

Թարգմանությունը՝ Էմմա Չոբանյանի