Ես կրքոտ հռետոր եմ. ես էդպես եմ խոսում․ Նիկոլ Փաշինյան․ ՏԵՍԱՆՅՈՒԹ

Նիկոլ Փաշինյանը հայտարարել է, որ Ազգային անվտանգության ծառայությունը օպերատիվ անհրաժեշտության դեպքում կարող է տեսանյութեր հրապարակել, այդ թվում՝ իր մուտքի և ելքի հետ կապված։ «Եթե գտնի օպերատիվ անհրաժեշտություն, այո՛, կարող է դա անել։ Իմն էլ, ցանկացած մեկինն էլ»,– ասել է Փաշինյանը։

Անդրադառնալով ընտրությունների ժամանակ անվավեր ճանաչված տեղամասերում քվեարկած շուրջ 2600 քաղաքացիների ձայների հարցին՝ վարչապետը նշել է, որ գործող օրենսդրությամբ նախատեսված է հստակ հաշվարկման բանաձև, որը կիրառվել է Կենտրոնական ընտրական հանձնաժողովի կողմից։ Փաշինյանի խոսքով՝ այդ տեղամասերում «Քաղաքացիական պայմանագիր» կուսակցությունը ստացել է շուրջ 1800 ձայն, իսկ քվեարկության արդյունքները ընդհանուր առմամբ համապատասխանել են հանրապետական պատկերին։

Վարչապետը նաև արձագանքել է այն գնահատականներին, թե Ազգային ժողովում իր ելույթների ժամանակ եղել է վրդովված կամ կորցրել է ինքնատիրապետումը։ Նրա խոսքով՝ ինքը միշտ է խոսել նույն ոճով։

«Ես կրքոտ հռետոր եմ։ Տասնհինգ տարի առաջ էլ եմ այդպես խոսել, տասը տարի առաջ էլ, հինգ տարի առաջ էլ։ Ես այդպես եմ հաղորդակցվում»,– նշել է Փաշինյանը։

Անդրադառնալով արտահանման խնդիրների հետևանքով վարկային պարտավորություններ ունեցող տնտեսվարողներին աջակցելու հարցին՝ վարչապետը հայտնել է, որ կառավարությունն արդեն ընդունել է աջակցության առաջին փաթեթը, որը նախատեսում է վեցամսյա աջակցություն։

Նրա խոսքով՝ անհրաժեշտության դեպքում կառավարությունը կքննարկի նաև լրացուցիչ միջոցառումների իրականացումը։ Փամբակում երկու քույրերի մահվան ողբերգական դեպքի կապակցությամբ Փաշինյանը նշել է, որ անհրաժեշտ է մանրամասն ուսումնասիրել հանգամանքները և պարզել՝ եղել են արդյոք անվտանգության միջոցառումներ, որոնք պետք է իրականացվեին, սակայն չեն իրականացվել։

Մանրամասները՝ տեսանյութում։