Արմեն Գրիգորյանին ես եմ հանձնարարել Հաջիևի հետ քննարկի հանդիպելու անհրաժեշտությունը. Փաշինյան․ ՏԵՍԱՆՅՈՒԹ

Վարչապետ Նիկոլ Փաշինյանը հայտարարել է, որ Ադրբեջանի նախագահի օգնական Հիքմեթ Հաջիևի և ՀՀ Անվտանգության խորհրդի քարտուղար Արմեն Գրիգորյանի հանդիպման նախաձեռնությունը հայկական կողմինն է եղել։ Կառավարությունում լրագրողների հարցին ի պատասխան՝ Փաշինյանն ասել է, որ հենց ինքն է հանձնարարել Արմեն Գրիգորյանին Ադրբեջանի իր գործընկերոջ հետ քննարկել՝ արդյոք կա հանդիպման անհրաժեշտություն և հետաքրքրություն։

Վարչապետի խոսքով՝ թե՛ հայկական, թե՛ ադրբեջանական փորձագիտական շրջանակներում նկատվել էին իրավիճակի հնարավոր սրման միտումներ, ինչի պատճառով անհրաժեշտ էր զբաղվել ռիսկերի կառավարմամբ։

Անդրադառնալով այն դիտարկմանը, թե հանդիպման ընթացքում քննարկվել են Հայաստանի ներքաղաքական զարգացումները և ընտրությունների արդյունքները, Փաշինյանը նշել է, որ հայկական կողմը որևէ բացատրություն չի տվել Ադրբեջանին։ Նրա խոսքով՝ դիվանագիտական շփումների հիմնական նպատակը կողմերի դիրքորոշումների, մտահոգությունների և ռազմավարությունների փոխադարձ պարզաբանումն է։

«Ոչ մեկը ոչ մի բանի բացատրություն չի տալիս։ Աշխարհի բոլոր երկրների բանակցությունները հենց դրա մասին են՝ միմյանց դիրքորոշումները, ռազմավարությունները, պլանները և մտահոգող հարցերը քննարկելը», – ասել է վարչապետը։

Փաշինյանի խոսքով՝ հանդիպման ընթացքում քննարկվել են նաև անազատության մեջ գտնվող անձանց, սահմանային իրավիճակի կառավարման և այլ հարցեր։ Նա ընդգծել է, որ հաղորդակցությունը դիվանագիտության անբաժանելի մասն է, իսկ դրա բացակայությունը՝ հաղորդակցության բացակայություն։

Մանրամասները՝ տեսանյութում։