06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Նույնիսկ դժվար ժամանակներում ՌԴ-ն և Թուրքիան խնդիների համատեղ լուծում են գտել․ Շոյգուն՝ Ֆիդանին
Քաղաքականություն
17.06.2026 | 17:37
Թուրքիայի ԱԳ նախարար Հաքան Ֆիդանը Ռուսաստան կատարած այցի շրջանակում հանդիպել է ՌԴ Անվտանգության խորհրդի քարտուղար Սերգեյ Շոյգուի հետ։ ՏԱՍՍ-ի հաղորդմամբ՝ Շոյգուն ասել է, որ Ռուսաստանը և Թուրքիան միշտ գտել են փոխադարձաբար ընդունելի լուծումներ տարբեր խնդիրների համար։
Խոսելով համատեղ աշխատանքի մասին՝ Շոյգուն որպես օրինակ բերել է «Սիրիայում միջազգային ահաբեկչության դեմ պայքարի համատեղ աշխատանքը»։ Նա նաև նշել է համատեղ աշխատանքն «Ուկրաինայի հարցում՝ թուրքական նավերը ուկրաինական նավահանգիստներից վերադարձնելու, Թուրքիա պարենի մատակարարումը կազմակերպելու և երկար ժամանակ արգելափակված բեռների ապաշրջափակման» վերաբերյալ։
«Մենք միասին աշխատել և համագործակցել ենք ամենադժվարին ժամանակներում»,- համաձայնել է Ֆիդանը՝ շնորհակալություն հայտնելով Ռուսաստանին Սիրիայում կայունության հասնելու գործում ունեցած դերի համար և վստահեցրել, որ «Թուրքիան անում է հնարավոր ամեն ինչ՝ Ուկրաինայում հակամարտությունը դադարեցնելու համար»։
Թուրքիայի ԱԳ նախարարն այցով Ռուսաստանում է հունիսի 16-ից 17-ը։ ՌԴ նախագահ Վլադիմիր Պուտինը չորեքշաբթի երեկոյան Կազանում կընդունի Հաքան Ֆիդանին, հայտնել է նախագահի օգնական Յուրի Ուշակովը։
«Թուրքիայի արտգործնախարար Ֆիդանը հիմա այցով գտնվում է Մոսկվայում։ Նա խնդրել է հանդիպում մեր նախագահի հետ։ Այս խնդրանքը կբավարարվի։ Նախագահը վաղը երեկոյան Կազանում կընդունի Թուրքիայի արտգործնախարարին»,- լրագրողներին նախօրեին ասել էր Ուշակովը։
Նա նշել էր, որ Պուտինը չորեքշաբթի արդեն կաշխատի Կազանում, որտեղ հունիսի 17-18-ը կկայանա Ռուսաստան-ԱՍԵԱՆ գագաթնաժողովը։
Թարգմանությունը՝ Էմմա Չոբանյանի
