Սամվել Կարապետյանի խոսքը կոնտեքստից կտրվել է և մանիպուլացվել

«Ուժեղ Հայաստան» կուսակցության նախագահ Սամվել Կարապետյանը մայիսի 22-ին պատասխանել է 5 լրատվամիջոցների խմբագիրների հարցերին։ Հարցերից մեկին նրա տված պատասխանը կոնտեքստից կտրվել է և մանիպուլացվել։

«Հրապարակ»-ի խմբագիր Արմինե Օհանյանը հարց է ուղղել Կարապետյանին․ «Վերջին օրերին մի շատ վատ դիսկուրս է Նիկոլը սկսել երկրով մեկ. այդ արցախցի երիտասարդը, որ մոտեցավ իրեն, ասաց՝ «ինչո՞ւ դու չես զոհվել, ինչո՞ւ ես կենդանի մնացել»։ Հետո սա ալիքով տարածվեց, և իր թիմն էլ վերցրեց այդ «չելենջը» ու սկսեցին շարունակել՝ «դու ինչո՞ւ չես զոհվել, նա ինչո՞ւ չի զոհվել»։ Հիմա մարդիկ սկսում են արդեն պատասխանել՝ «բա դուք ինչո՞ւ չեք զոհվել»։ Կարծես թե զոհվելը մի երանելի վիճակ է. մենք, փոխանակ մտածենք նրա մասին, թե ինչու են այդքան մարդ զոհվել, հիմա մեկս մյուսիս հարցնում ենք, թե սա ինչո՞ւ չի զոհվել։

․․․Ես կարծում եմ, որ հասարակությունը շատ վատ ընդունեց այս դիսկուրսը, բոլորը դատապարտեցին, մերժեցին, «թքեցին-մրեցին», բայց դե իրենց վրա դա չի ազդում։ Ուղղակի կա մի զանգված, որը լսում ու ասում է՝ «ճիշտ է ասում»։ Ես կուզեի, որ ոչ թե մեզ, այլ այդ մարդկանց բացատրեք՝ ոչ թե զոհվելու մասով, այլ նրա, թե մասնակցե՞լ են պատերազմին Ձեր զավակները, և առհասարակ՝ ո՞նց կարելի է դադարեցնել այս տեսակ գարշելի դիսկուրսների տարածումը»։

Հարցազրույցի տարածվող հատվածում Կարապետյանն ասել է․ «Մեր ընտանիքի տղաները, թե՛ պատերազմի ժամանակ, թե՛ դրանից առաջ աշխատել են, որ իրենք չզոհվեն, որովհետև իրենք կենդանի մեռելներ են»։

Ելնելով վերը նշված հարցադրման կոնտեքստից՝ ակնհայտ է դառնում, որ «իրենք» ասելով Կարապետյանը նկատի է ունեցել ոչ թե իր ընտանիքի անդամներին, այլ իշխանության ներկայացուցիչներին։ Առավել ևս, որ նա օգտագործում է «իրենք կենդանի մեռելներ են» արտահայտությունը։ 

«Մենք առաջարկում ենք ծրագրեր՝ ինչպես զարգացնել մեր երկիրը, ինչպես ուժեղացնել մեր անվտանգությունը, որպեսզի մարդիկ չզոհվեն։ Այս մարդիկ, բերելով հազարավոր զոհեր այս տարիների ընթացքում, նույնիսկ չեն կշտացել դրանից. ուզում են, որ ընդդիմադիր ուժերը, ընդդիմադիր ժողովուրդը բոլորը զոհվեն։ 

Եթե մենք չկանգնեցնենք այս պրոցեսները, իրենք կհասնեն իրենց նպատակին. սաֆարովները կմտնեն Հայաստան, և այդ ժամանակ մենք չգիտենք՝ ով կզոհվի, ով կենդանի կմնա»,-Օհանյանի հարցին ի պատասխան ասել է Կարապետյանը։

Կոնտեքստից կտրված տեսանյութը տարածել են «Քաղաքացիական պայմանագիր» կուսակցության անդամներն ու աջակիցները։ Հարցազրույցից 2 օր անց այս հատվածն իր ֆեյսբուքյան էջում  հրապարակել է վարչապետի աշխատակազմի ղեկավարի տեղակալ Տարոն Չախոյանը՝ գրելով․ «Խոստովանեց», ինչից հետո տեսանյութը տարածվել է ՔՊ-ին հարող այլ էջերում։ Տեսանյութը, իր մեկնաբանությամբ, հրապարակել է նաև ՔՊ պատգամավոր Վահագն Ալեքսանյանը։

Միայն Տարոն Չախոյանի էջում տեսանյութն այս պահին 311 հազար դիտում ունի, մեկնաբանություններից պարզ է դառնում՝ օգտատերերն այն ճիշտ չեն հասկացել, նրանց մոտ կարծիք է ձևավորվել, թե Սամվել Կարապետյանն իր ընտանիքի անդամների մասին է խոսել, ոչ թե իշխանության։ 

Վահագն Ալեքսանյանի էջում տեսանյութը 545 հազար դիտում ունի, 1700 օգտատեր կիսվել է դրանով, ավելի քան 1800-ը՝ մեկնաբանել։

Տարոն Չախոյանի հրապարակած տեսանյութը իր էջում է տեղադրել նաև Araratnews-ը։ ԶԼՄ-ի էջում տեսանյութը շուրջ 80 հազար դիտում ունի։

Եվգենյա Համբարձումյան