Արթուր Օսիպյանը տեղափոխվել է հացադուլավորների համար նախատեսված խուց

Արցախի հեղափոխական կուսակցության նախագահ Արթուր Օսիպյանը հացադուլ հայտարարելու մասին դիմում է գրել, նրան այս պահին տեղափոխում են հացադուլավորների համար նախատեսված խուց։ Այս մասին FactorTV-ի հարցմանն ի պատասխան հայտնեցին Քրեակատարողական ծառայությունից։

«Արթուր Օսիպյանը նշել է, որ ծանոթ չէր ընթացակարգին. երբ Ձերբակալվածների պահման վայրում և դատարանում ասել է, որ հացադուլ է հայտարարում, չգիտեր, որ անհրաժեշտ է նաև քրեակատարողական հիմնարկում դիմում գրել»,- նշեց ՔԿԾ լրատվության վարչության պետ Նոնա Նավիկյանը։

Նշենք՝ երեկ Օսիպյանի պաշտպանական կողմը հայտարարել էր, որ արցախցի քաղաքական գործիչը մայիսի 18-ից հացադուլի մեջ է։ FactorTV-ն այսօր Քրեակատարողական ծառայությունից հետաքրքրվել էր, թե պաշտոնապես քանի օր է, որ կալանավորը հացադուլի մեջ գտնվում, ինչին ի պատասխան հայտնել էին, որ Օսիպյանից որևէ դիմում չեն ստացել։ Փաստացի, այսօրվա FactorTV-ի հրապարակումից հետո դիմումը գրվել է։

Հիշեցնենք՝ շաբաթ օրն Արթուր Օսիպյանը մոտեցել էր Արաբկիր վարչական շրջանում քարոզարշավ իրականացնող Նիկոլ Փաշինյանին և հարցեր ուղղել Հայաստանի անվտանգության և Ադրբեջանի կողմից առաջ քաշվող պահանջների մասին՝ նշելով, որ Բաքուն միջազգային հարթակներում բարձրացնում է ադրբեջանցի փախստականների վերադարձի հարցը։ Փաշինյանը կտրուկ էր արձագանքել՝ Օսիպյանին մեղադրելով «ադրբեջանական նարատիվներ» տարածելու մեջ։ Ապա իրավիճակը սրվել էր, ու Փաշինյանը Օսիպյանին կոշտ բառապաշարով հորդորել էր հեռանալ։

Ժամեր անց Արթուր Օսիպյանը ձերբակալվել էր, ավելի ուշ դատարանը նրա նկատմամբ որպես խափանման միջոց էր ընտրել երկամսյա կալանքը։

Նրան մեղադրանք էր առաջադրվել ՀՀ քրեական օրենսգրքի 330-րդ հոդվածի 2-րդ մասի 3-րդ կետով (բռնություն կիրառելու հրապարակային կոչեր, բռնությունը հրապարակայնորեն արդարացնելը կամ քարոզելը), 297-րդ հոդվածի 1-ին մասով (խուլիգանություն), ինչպես նաև 211-րդ հոդվածի 1-ին մասով (քարոզչություն կատարելուն կամ քարոզչությունից հրաժարվելուն հարկադրելը կամ քարոզչությանը այլ կերպ խոչընդոտելը)։

Քրեական հետապնդում հարուցելուց և կալանավորելուց հետո հասարակական կազմակերպություններն ու իրավապաշտպանները իշխանություններից և իրավապահ մարմիններից պահանջում են դադարեցնել Օսիպյանի նկատմամբ իրականացվող գործողությունները։

Ռոզա Վարդանյան