02.07.2026 | 06:06
ԱԱ-2026. ԱՄՆ-ի հավաքականը շարժվում է առաջ. ՏԵՍԱՆՅՈՒԹ
Brent տեսակի նավթի գինը հասել է 2022թ․ փետրվարից ի վեր ամենաբարձր մակարդակին
Քաղաքականություն
30.04.2026 | 19:25
Brent նավթի գինը գերազանցել է մեկ բարելի համար 126 դոլարը՝ հասնելով ամենաբարձր մակարդակին Ռուսաստանի կողմից Ուկրաինա լիարժեք ներխուժումից ի վեր, հաղորդում է CNN-ը։ Bloomberg-ն էլ նշում է, որ նավթի համաշխարհային գներն աճել են 7,1%-ով, սակայն հետագայում տեմպերը դանդաղել են, և գինը հաստատվել է շուրջ 122 դոլարի սահմանում։
The Wall Street Journal-ը գնի աճը կապել է տեղեկությունների հետ, որ ԱՄՆ նախագահ Դոնալդ Թրամփն իր օգնականներին հանձնարարել է պատրաստվել Իրանի ռազմածովային երկարատև շրջափակմանը, գրում է Current time-ը։
Bloomberg-ը հաղորդել էր, որ ԱՄՆ կենտրոնական հրամանատարությունը խնդրել է Մերձավոր Արևելքում տեղակայել Dark Eagle գերձայնային հրթիռներ՝ Իրանի վրա հնարավոր հարվածների համար: Axios-ը նաև հաղորդում է, որ ԱՄՆ զինված ուժերը պատրաստել են Իսլամական Հանրապետության դեմ «կարճ և հզոր» հարվածների ալիքի ծրագիր, որը, հավանաբար, թիրախավորելու է ենթակառուցվածքները։
Մերձավոր Արևելքում ԱՄՆ Կենտրոնական հրամանատարության տվյալներով՝ ապրիլի 28-ի դրությամբ՝ Իրանի Չաբահար նավահանգստում (Իրանի համար ռազմավարական նավահանգիստ՝ դեպի Հնդկական օվկիանոս ուղիղ ելքով) մնացել է ավելի քան 20 նավ։ Մինչև շրջափակումը ԱՄՆ զինվորականները պնդում էին, որ օրական միջինում հինգ նավ էր խարիսխ գցում կամ կանգ առնում այս նավահանգստում։
Փետրվարի 28-ին Միացյալ Նահանգներն Իսրայելի հետ համատեղ ռազմական գործողություն սկսեց Իրանի դեմ։ Հարվածների հետևանքով զոհվել են երկրի գերագույն առաջնորդ այաթոլլահ Ալի Խամենեին, անվտանգության խորհրդի քարտուղար Ալի Լարիջանին և «Բասիջ» աշխարհազորի հրամանատար Ղոլամրեզա Սոլեյմանին, ինչպես նաև վնասվել են երկրի ռազմական և միջուկային օբյեկտները։
Իրանը հակադարձում է՝ հարվածելով Պարսից ծոցում գտնվող ամերիկյան բազաներին և Վաշինգտոնի դաշնակիցների ենթակառուցվածքներին, ինչպես նաև արգելափակելով նավագնացությունը Հորմուզի նեղուցում, որով անցնում է աշխարհի նավթի ծովային փոխադրման շուրջ 20%-ը: Պարսից ծոցի հիմնական նավթ արտադրողները ստիպված էին կտրուկ կրճատել հում նավթի արտադրությունը, ինչը հանգեցրեց վառելիքի գների բարձրացմանը։
Financial Times-ի վերլուծաբանները Ռուսաստանը համարում են Իրանում հակամարտության հիմնական շահառուն: Մասնավորապես, ռուսական Urals հում նավթի գինը հասել է 13 տարվա մեջ ամենաբարձր մակարդակին:
ԱՄՆ ֆինանսների նախարար Սքոթ Բեսենթը հայտարարել է, որ Միացյալ Նահանգները կարող է շարունակել վերացնել ռուսական նավթի նկատմամբ սահմանափակումները: ԱՄՆ Ֆինանսների նախարարության վերլուծության համաձայն՝ Ռուսաստանը կարող է ստանալ ոչ ավելի, քան 2 միլիարդ դոլար:
Թարգմանությունը՝ Էմմա Չոբանյանի
