16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
Զելենսկին արձագանքել է Պուտինի՝ մայիսի 9-ի հրադադարի առաջարկին
Քաղաքականություն
30.04.2026 | 14:02
Ուկրաինայի նախագահ Վլադիմիր Զելենսկին արձագանքել է Ռուսաստանի նախագահ Վլադիմիր Պուտինի՝ մայիսի 9-ի կապակցությամբ հրադադար հաստատելու առաջարկին։
«Ես մեր ներկայացուցիչներին հանձնարարել եմ կապ հաստատել ԱՄՆ նախագահի թիմի հետ և ծանոթանալ Ռուսաստանի կարճաժամկետ հրադադարի առաջարկի մանրամասներին»,- գրել է Ուկրաինայի նախագահ Վլադիմիր Զելենսկին Տելեգրամում, նշում է BBC-ի ռուսական ծառայությունը։
Նա բացատրել է, որ Ուկրաինան ձգտում է խաղաղության և աջակցում է պատերազմը դադարեցնելու դիվանագիտական ջանքերին։
«Կպարզենք, թե կոնկրետ ինչի մասին է խոսքը․ մի քանի ժամվա անվտանգության ապահովում Մոսկվայում շքերթի համա՞ր, թե՞ ավելին»,- նշել է նա՝ հավելելով, որ Կիևն առաջարկում է երկարաժամկետ հրադադար, որը կապահովի «մարդկանց համար հուսալի անվտանգություն և երկարատև խաղաղություն»։
Ռուսաստանի նախագահի օգնական Յուրի Ուշակովի խոսքով՝ ապրիլի 29-ին ԱՄՆ նախագահ Դոնալդ Թրամփի հետ հեռախոսազրույցի ժամանակ ՌԴ նախագահ Վլադիմիր Պուտինը հայտարարել է «Հաղթանակի օրվա տոնակատարությունների ընթացքում հրադադար հաստատելու պատրաստակամության մասին»։
«Ես առաջարկել եմ փոքր հրադադար, և կարծում եմ, որ նա կարող է դա անել։ Նա կարող է հայտարարել դրա հետ կապված ինչ-որ բանի մասին»,- Պուտինի հետ զրույցից հետո ասել է Թրամփը։
Մայիսի 9-ի Հաղթանակի շքերթը Մոսկվայի Կարմիր հրապարակում կանցկացվի առանց ռազմական տեխնիկայի՝ 2007 թվականից ի վեր առաջին անգամ։ Կրեմլը դա բացատրել է Ուկրաինայից եկող «ահաբեկչական սպառնալիքով» և այն փաստով, որ այս տարին հոբելյանական չէ։
Թարգմանությունը՝ Էմմա Չոբանյանի
