21.05.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Ռոնալդուն՝ սաուդյան լիգայի մասին․ «Ես շատ վատ բաներ եմ տեսնում, սա այլևս ֆուտբոլ չէ»
30.04.2026 | 12:50
«Ալ Նասրի» պորտուգալացի հարձակվող Կրիշտիանու Ռոնալդուն «Ալ Ահլիի» նկատմամբ հաղթանակից (2:0) հետո քննադատել է Սաուդյան Արաբիայի առաջնությանը կազմակերպչական հարցերում թերանալու համար ու որոշ ֆուտբոլիստների, որոնք բացասական գրառումներ են անում լիգայի մասին։
«Բոլորը բողոքում են։ Կարծում եմ՝ դրանում ոչ մի օգուտ չկա։ Բոլորն անում են ավելին, քան պետք է անեն։ Սա ֆուտբոլ է, այլ ոչ թե պատերազմ։ Մենք գիտենք, որ բոլորը պետք է պայքարեն և ցանկանում են հաղթել, սակայն կան բաներ, որ անթույլատրելի են։
Ես կխոսեմ մրցաշրջանի վերջում, քանի որ շատ վատ բաներ եմ տեսնում։ Շատ խաղացողներ բողոքներ են գրում մրցավարների, լիգայի, նախագծի մասին։ Կարծում եմ՝ դա սխալ է և չի համապատասխանում լիգայի նպատակներին։
Մենք պետք է օրինակ ծառայենք ոչ միայն այստեղ, այլև Եվրոպայում, եթե ուզում ենք նրանց հետ մրցել աշխարհի լավագույն լիգաներից մեկի կոչման համար։ Կարծում եմ՝ մենք պետք է դադարեցնենք սա, վերլուծենք իրավիճակը և խոսենք սաուդյան լիգայի հետ, քանի որ ինձ համար սա այլևս ֆուտբոլ չէ»,- «Ոսկե գնդակի» 5-ակի դափնեկրի խոսքը մեջբերում է Record-ը։
Հիշեցնենք, որ 41-ամյա ֆուտբոլիստը 2023 թվականից է խաղում «Ալ Նասրում», որի կազմում Սաուդյան Արաբիայի ընթացիկ առաջնությունում մասնակցել է 26 հանդիպման, դարձել է 25 գոլի ու 2 գոլային փոխանցման հեղինակ։
