Վարդան Ղուկասյանի՝ այս պահին ՀՀ գալը նշանակում է, որ նա կամիկաձե է․ քրգործերը շինծու են, դեմ կլինեմ․ Լևոն Բաղդասարյան. ՏԵՍԱՆՅՈՒԹ

ԴՕԿ Կուսակցության շտաբի պետ, փաստաբան Լևոն Բաղդասարյանը Factor TV-ին տված հարցազրույցում պարզաբանումներ է ներկայացրել Վարդան Ղուկասյանի իրավական կարգավիճակի և հետագա ծրագրերի վերաբերյալ։ Նա նաև խոսել է քաղաքական ուժի առաջիկա անելիքների ու սկզբունքների մասին՝ հայտարարելով, որ իշխանության գալու դեպքում հայրենիքի դավաճանության համար կսահմանվի գնդակահարություն։

Խոսելով խորհրդարանական ընտրություններին մասնակցելու ձևաչափի և սկզբունքների մասին՝ Բաղդասարյանը նշել է, որ իրենց կուսակցությունը նախադեպ է ստեղծելու՝ կանխելու համար քաղաքական առևտուրը։ Ըստ նրա՝ բոլոր թեկնածուների հետ կնքվելու է քաղաքացիաիրավական պայմանագիր, որով նրանք պարտավորվելու են հավատարիմ մնալ կուսակցական գաղափարախոսությանը։

«Քաղաքացուն առաջարկվել է հետևյալ խաղի կանոնը․ գիտակցո՞ւմ ես, որ գնում ես կուսակցության ցուցակով, կրողը պետք է լինես կուսակցության գաղափարախոսության, անկախ նրանից՝ կուսակցակա՞ն ես, թե՞ ոչ։ Եթե դու գաղափարախոսությանը դեմ լինես, ուրեմն պետք է մանդատը վայր դնես։ Իսկ եթե ցանկանում ես, որպեսզի գնաս այլ բլոկ, այլ կուսակցություն ԱԺ մտած, ուրեմն պետք է հատուցես վնասը»,– ասել է նա։ Ըստ Բաղդասարյանի՝ այդ դեպքում նախատեսվելու է «բավականին մեծ, մի քանի տասնյակ զրոներով» ֆինանսական փոխհատուցում։

Լևոն Բաղդասարյանը հայտարարել է, որ իշխանության գալուց հետո իրենք առաջին հերթին վերացնելու են «ինտրիգները» և սահմանելու են մահապատիժ։

«Իրականում գալու ենք իշխանության Աստծով, և այդ իշխանության գալուց հետո առաջին խնդիրը լինելու է այս ինտրիգները վերացնելը։ Դավաճանությունը, այո, մահապատիժ է սարքվելու։ Միանշանակ։ Ոչ միայն առաջարկելու եմ, լինելու եմ ջատագովը, որպեսզի հայրենիքի դավաճանությունը լինի գնդակահարություն»,– ընդգծել է նա՝ հավելելով, որ սա ոչ միայն բռնության կոչ չէ, այլև «Աստվածաշնչյան իրավանորմ է»։

Անդրադառնալով Վարդան Ղուկասյանի իրավական կարգավիճակին՝ Բաղդասարյանը հերքել է, թե նա գտնվում է «ամերիկյան բանտում»։ Նրա խոսքով՝ ամերիկյան դատարանը որոշում էր կայացրել Ղուկասյանի արտաքսման մասին, որը բողոքարկվել է և օրինական ուժի մեջ չի մտել։ «Չորս երկիր հատուկ վիզայի կարգավիճակով հրավիրեցին։ Ի՞նչ է նշանակում հատուկ վիզա՝ ֆուլ վիզա է դա, որտեղ ապահովվում է ամեն ինչ՝ և՛ անվտանգությունը, և՛ մնացյալը։ Եվ պարոն Ղուկասյանը ընտրեց Ռուսաստանի տարբերակը»,– ասել է շտաբի պետը։

Լևոն Բաղդասարյանը նշել է, որ իրենց ուժը բաց է համագործակցության համար բոլորի հետ՝ անկախ նրանց աշխարհաքաղաքական կողմնորոշումից, սակայն կա հստակ բացառություն։

«Իմ մոտ եղել է հերթ քաղաքական ուժերի, քաղաքական անհատների, քաղաքական միավորների։ Բացարձակապես չենք նայել, չեմ նայել, որ ունի ռուսական կողմնորոշում, արևմտյան կողմնորոշում, թե այլ կողմնորոշում, որովհետև դա դրվել է երկրորդ պլան, և մենք հասկացել, գիտակցել ենք, որ բացառապես միասնական ուժերով պետք է գնալ կառուցել արևային Հայաստան։ Բացառությամբ նախկինների և ներկաների»,– ասել է նա՝ հավելելով, որ վերջիններս համագործակցության դուռը կբացեն միայն այն դեպքում, երբ «հրապարակային կհայտարարեն բոլոր այն սխալները, որոնք իրենք կատարել են, կզղջան, մեղավորները կենթարկվեն պատասխանատվության»։

Հաղորդումն ամբողջությամբ՝ տեսանյութում։

Ռոբերտ Անանյան