06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
Ադրբեջանի ՊՆ ղեկավարն Իտալիայում ռազմական համագործակցության հարցեր է քննարկել
Քաղաքականություն
28.04.2026 | 14:49
Ադրբեջանի պաշտպանության նախարար, գեներալ-գնդապետ Զաքիր Հասանովի գլխավորած պատվիրակությունը պաշտոնական այցով Իտալիայում է։ Ադրբեջանի ՊՆ-ի հաղորդմամբ՝ նա հանդիպել է իր իտալացի գործընկեր Գվիդո Կրոզետտոյի հետ։ Քննարկվել են ռազմավարական գործընկերության վրա հիմնված երկկողմ հարաբերությունները և դրանց հեռանկարները։
Կողմերը մանրամասն մտքեր են փոխանակել ռազմական, ռազմատեխնիկական և ռազմակրթական ոլորտներում համագործակցության հետագա զարգացման, ինչպես նաև փոխադարձ հետաքրքրություն ներկայացնող այլ հարցերի շուրջ։
«Ջերմ հանդիպում ունեցա իմ ադրբեջանցի գործընկերոջ՝ գեներալ-գնդապետ Զաքիր Հասանովի հետ։ Ադրբեջանի դերը Եվրասիական տարածաշրջանում հիմնարար է, և այս երկիրն Իտալիայի հիմնական գործընկերներից մեկն է, այդ թվում՝ էներգետիկ ոլորտի ռազմավարական գործընկեր։ Ես համերաշխություն հայտնեցի և խստորեն դատապարտեցի վերջերս Ադրբեջանի վրա Իրանի կողմից անօդաչու թռչող սարքերի հարձակումը, ինչպես նաև երախտագիտությամբ նշեցի Բաքվի կողմից լարվածության կառավարման գործում ցուցաբերած զսպվածությունն ու պատասխանատվության զգացումը»,- X-ում գրել է Կրոզետտոն։
Նա նշել է, որ հանդիպման ընթացքում հաստատվել է երկկողմ համագործակցության ամրապնդումը և աճող կարևորությունը, մասնավորապես, պաշտպանության ոլորտում, այդ թվում՝ համապատասխան զինված ուժերի միջև զորավարժությունների միջոցով, ինչպես նաև պաշտպանական արդյունաբերության ոլորտում։ Վերահաստատվել է փոխադարձ պատրաստակամությունը՝ շարունակել համագործակցության ոլորտների ընդլայնման վերաբերյալ քննարկումները։
Շեշտվել է նաև Մերձավոր Արևելքում և Կովկասյան տարածաշրջանում կայունության պահպանման կարևորությունը, այդ թվում՝ հաշվի առնելով առկա հակամարտությունների հետևանքները տարածաշրջանային անվտանգության համար։
Թարգմանությունը՝ Էմմա Չոբանյանի
