Իսրայելի դեսպանն Ուկրաինայի ԱԳՆ է կանչվել՝ «գողացված հացահատիկով» երկրորդ նավի պատճառով

Ուկրաինայի արտաքին գործերի նախարարությունը կանչել է Իսրայելի դեսպանին՝ բողոքելու Ռուսաստանի կողմից օկուպացված տարածքներից հացահատիկ տեղափոխող երկրորդ նավի՝ իսրայելական Հայֆայի նավահանգիստ ժամանման դեմ: Այս մասին X-ում հայտնել է Ուկրաինայի արտաքին գործերի նախարար Անդրեյ Սիբիհան, գրում է BBC-ի ռուսական ծառայությունը:

Axios-ը նախկինում հաղորդել էր, որ Պանամայի դրոշով ուկրաինական օկուպացված տարածքներից հացահատիկ տեղափոխող (Ուկրաինան այն անվանում է «գողացված հացահատիկ») հունական Panormitis անունով բեռնատար նավն ուղևորվում է դեպի Հայֆա։

Մինչ այդ, ապրիլի կեսերին Հայֆա էր ժամանել «Աբինսկ» նավը՝ նույն ծագման հացահատիկով։ Ուկրաինան բողոք էր  հայտարարել և պահանջել նավի առգրավումը, սակայն Իսրայելի իշխանությունները չէին արձագանքել։

«Դժվար է հասկանալ Իսրայելի կողմից Հայֆա գողացված ապրանքներ հասցնող նախորդ նավի վերաբերյալ Ուկրաինայի օրինական բողոքին պատշաճ արձագանքի բացակայությունը»,- գրել է նախարար Սիբիհան։

Իսրայելի արտաքին գործերի նախարար Գիդեոն Սաարն արձագանքել է Կիևի բողոքին։

«Այս մեղադրանքները հաստատող ապացույցներ դեռևս չեն ներկայացվել»,- գրել է Սաարը X սոցիալական ցանցում՝ հավելելով, որ «այս հարցը կվերանայվի», և Իսրայելի իշխանությունները կգործեն օրենքի համաձայն։

Իսրայելի ԱԳ նախարարի խոսքով՝ Ուկրաինայի արտաքին գործերի նախարարությունը «նույնիսկ իրավաբանական օգնության համար չի դիմել, նախքան լրատվամիջոցներին և սոցիալական ցանցերին դիմելը»։

«Դիվանագիտական ​​հարաբերությունները, հատկապես՝ բարեկամ երկրների միջև, չեն իրականացվում Twitter-ում կամ լրատվամիջոցներում»,- նշել է Սաարը։