Ուրախ եմ լսել, որ նախագահ Դոնալդ Թրամփը և մյուս ներկաները ապահով են ու լավ վիճակում․ Նիկոլ Փաշինյան

Ուրախ եմ լսել, որ նախագահ Դոնալդ Թրամփը և առաջին տիկինը, փոխնախագահը և մյուս ներկաները ապահով են ու լավ վիճակում՝ Սպիտակ տան թղթակիցների ամենամյա ընթրիքի ժամանակ տեղի ունեցած մտահոգիչ կրակոցից հետո, X-ում գրառում է կատարել վարչապետ Նիկոլ Փաշինյանը։

«Բռնությունը տեղ չունի մեր ժողովրդավարական հասարակություններում։ Մաղթում եմ ԱՄՆ նախագահին շարունակական բարեկեցություն այսօրվա մարտահրավերների պայմաններում»,-գրել է նա։

Ավելի վաղ հայտնել ենք, որ ԱՄՆ նախագահ Դոնալդ Թրամփը և նրա վարչակազմի անդամները տարհանվել են Սպիտակ տան թղթակիցների ասոցիացիայի տարեկան ընթրիքից, որն անցկացվում էր Washington Hilton հյուրանոցում, «անվտանգության սպառնալիքի» պատճառով, հայտնում են տեղական լրատվամիջոցները։ ԶԼՄ-ների տվյալներով՝ խոսքը վերաբերում է մի տղամարդու, ով հյուրանոցում կրակ է բացել։

ԱՄՆ գաղտնի ծառայությունն ու այլ անվտանգության մարմինները շրջապատել են հյուրանոցի հանդիսությունների սրահը, որտեղ ավելի քան հարյուր մարդ սպասում էր Թրամփի ելույթին, գրում է Associated Press գործակալությունը։ Մասնակիցներից ոմանք հայտնել են, որ, իրենց կարծիքով, լսել են հինգից ութ կրակոց։ Կրակողը չի ներխուժել սրահ․ միջադեպը տեղի է ունեցել հյուրանոցի այլ հատվածներից մեկում։

Միջոցառմանը ներկա էին նաև առաջին տիկին Մելանյա Թրամփը, ԱՄՆ փոխնախագահ Ջեյ Դի Վենսը, պաշտպանության նախարար Փիթ Հեգսեթը և պետքարտուղար Մարկո Ռուբիոն։ Նրանք, ինչպես նաև միջոցառմանը հրավիրված լրագրողները, տարհանվել են, իսկ հյուրանոցում անվտանգության միջոցները խստացվել են։