Ըմբշամարտի ԵԱ. Թևանյանը և Խնձրցյանը կգոտեմարտեն բրոնզե մեդալի համար

Ալբանիայի մայրաքաղաք Տիրանայում ընթացող ազատ ոճի ըմբշամարտի Եվրոպայի առաջնության առաջին մրցումային օրը պայքարի մեջ մտած Հայաստանի 4 ներկայացուցիչներին չհաջողվեց դուրս գալ եզրափակիչ։

Մանվել Խնձրցյանը (57 կգ) պայքարը սկսեց որակավորման փուլից ու 12:6 հաշվով հաղթեց գերմանացի Հորսթ Լեռին, իսկ երկրորդ գոտեմարտում ժամանակից շուտ 12:1 հաշվով վստահ հաղթանակի հասավ ռումինացի Ռազվան Կովաչի նկատմամբ ու դուրս եկավ կիսաեզրափակիչ։

Խնձրցյանը եզրափակիչի ուղեգիրը վիճարկեց Ռուսաստանի ներկայացուցիչ Մուսա Մեխտիխանովի հետ ու պարտվեց 0:5 հաշվով։ Ապրիլի 25-ին հայ ըմբիշը բրոնզե մեդալի համար գոտեմարտ կանցկացնի Սերբիան ներկայացնող Ազամատ Տուսկաևի հետ։

2023թ․ Եվրոպայի չեմպիոն Վազգեն Թևանյանը (65 կգ) որակավորման փուլում 5:2 հաշվով հաղթեց Ֆրանսիայի ներկայացուցիչ Խամզատ Արսամերզուևին, իսկ քառորդ եզրափակիչում 2:1 հաշվով ուժեղ գտնվեց Բուլղարիան ներկայացնող Շամիլ Մամեդովից։

Կիսաեզրափակիչում Թևանյանը մրցեց ռուսաստանցի Բաշիր Մագոմեդովի հետ ու պարտություն կրեց 3:3 հաշվով։ Վազգենը նույնպես կգոտեմարտի բրոնզե մեդալի համար։

Դավիթ Մարգարյանը (70 կգ) մեկնարկային գոտեմարտում 3:6 հաշվով պարտվել է ուկրաինացի Ալեքսանդր Բորուտային ու դուրս մնացել պայքարից։

Հրայր Ալիխանյանը (79 կգ) որակավորման փուլում 0:6 հաշվով պարտություն է կրել ռուսաստանցի Ախմեդ Ուսմանովից, որը նվաճել է եզրափակիչի ուղեգիր։ Ալիխանյանը հնարավորություն է ստացել պայքարել բրոնզե մեդալի համար ու սփոփիչ գոտեմարտ կանցկացնի ուկրաինացի Վիտալի Մալենկովի հետ։

Հայաստանի հավաքականի կազմում մրցավայր են մեկնել նաև Արսեն Հարությունյանը (61 կգ), Նարեկ Հարությունյանը (74 կգ), Մուշեղ Մկրտչյանը (92 կգ) և Խաչատուր Խաչատրյանը (125 կգ), որոնք պայքարը կսկսեն ապրիլի 25-ին։