03.08.2026 | 16:02
ԱԺ նախագահ Ռուբեն Ռուբինյանի ճեպազրույցը․ ՈՒՂԻՂ
Ադրբեջանական բանկը ներառվել է ԵՄ-ի կողմից ՌԴ-ի դեմ սահմանված 20-րդ պատժամիջոցների փաթեթում
Քաղաքականություն
24.04.2026 | 23:15
Ռուսաստանի դեմ Եվրամիության պատժամիջոցների 20-րդ փաթեթն ուղղված է ոչ միայն Մոսկվային, այլև երրորդ երկրներին, որոնք դեր են խաղում նրա հետ տնտեսական հարաբերություններում։ Այս համատեքստում ուշագրավ է ադրբեջանական բանկի ներառումը ցուցակում, գրում են ադրբեջանական լրատվամիջոցները։
Եվրամիության պատժամիջոցների նոր որոշումը նպատակ ունի մեծացնել ճնշումը Մոսկվայի վրա՝ Ուկրաինայում պատերազմը շարունակելու համար, և առաջին անգամ կիրառում է ավելի խիստ հատուկ մեխանիզմներ պատժամիջոցներից խուսափելու դեմ։
Ամենաուշագրավ կողմերից մեկը երրորդ երկրների ֆինանսական հաստատությունների թիրախավորումն է, որոնք, ենթադրաբար, անուղղակիորեն աջակցում են Ռուսաստանի պատերազմական ջանքերին: ԵՄ-ն իր պատժամիջոցների ցանկում ներառել է Ադրբեջանում, Ղրղզստանում և Լաոսում չորս բանկեր: Նշվում է, որ դրանք նպաստել են Ռուսաստանի ֆինանսական գործարքներին կամ օգնել են նրան խուսափել պատժամիջոցներից։ Չի նշվում, թե որ բանկերի մասին է խոսքը։
Նոր փաթեթը ներառում է ֆինանսների, էներգետիկայի, առևտրի և տեղեկատվության ոլորտները և նպատակ ունի ստիպել Ռուսաստանին բանակցություններ վարել։
Ադրբեջանի Կասպյան նավագնացության ընկերությունն էլ (ASCO) հաղորդում է, որ Եվրամիությունը պատժամիջոցների ցանկից հանել է ադրբեջանական հինգ նավ: Հայտարարության համաձայն՝ «Եվրամիության խորհրդի 2026 թվականի ապրիլի 23-ի որոշմամբ չեղարկվել են ASCO-ին պատկանող Zagatala նավի և ASCO-ի ու SOCAR-ի համատեղ ձեռնարկությանը պատկանող Shusha, Karabakh, Khankendi և Zangezur նավերի նկատմամբ սահմանված պատժամիջոցները»:
«Նշված նավերը երկարաժամկետ վարձակալության են տրվել երրորդ կողմերին՝ չարթերային պայմանագրերով, և դրանց շահագործումն իրականացվել է միջազգային կանոնակարգերին, այդ թվում՝ պատժամիջոցների պահանջներին լիովին համապատասխան։ Որոշումը համարվում է միջազգային իրավունքի վրա հիմնված օբյեկտիվ մոտեցման, ինչպես նաև կառուցողական երկխոսության արդյունք»,- ասվում է հայտարարության մեջ։
Թարգմանությունը՝ Էմմա Չոբանյանի
