Հարգանքի տուրք ենք մատուցում ցեղասպանության զոհերի հիշատակին, կոչ ենք անում անցյալի հետ առերեսվել. Դիարբեքիրի փաստաբանների ասոցիացիա

1915 թվականի ապրիլի 24-ի իրադարձությունների տարելիցը խորը վերքեր է թողել ամբողջ հասարակության հիշողության մեջ։ Այս մասին ասվում է Դիարբեքիրի փաստաբանների ասոցիացիայի տարածած հայտարարությունում, գրում է T24-ը։

«Մենք հարգանքի տուրք ենք մատուցում նրանց, ում կորցրել ենք ցեղասպանության ժամանակ, կոչ ենք անում սկսել անցյալի հետ առերեսվելու և ճշմարտությունը կրկին բացահայտելու գործընթաց՝ ապագայի համար, որտեղ գերակշռում են խաղաղությունն ու մարդու իրավունքները»,- ասվում է հայտարարությունում։

Դրանում 1915 թվականի իրադարձությունները որակվել են որպես ցեղասպանություն։ Նշվում է, որ «այդ բոլոր իրադարձությունները միջազգային մակարդակով լայնորեն սահմանվում են որպես ցեղասպանություն՝ հիմնվելով պատմական իրականության ընդհանուր գնահատման և մարդկության խղճի վրա»։

«Հայերը, որոնք այս հողերի մասն են կազմում, 1915 թվականին հարկադրվել են տեղահանության և սպանվել կամ թողնվել են մահանալու տեղահանության ճանապարհին: Այդ ժամանակվանից անցել է ավելի քան մեկ դար, և այս ճշմարտությանը առերեսում չի եղել, և ոչ էլ արդարադատություն է իրականացվել հայերի կրած տառապանքների համար։ Մենք կարծում ենք, որ մարդկության դեմ հանցագործությունները կարող են հաղթահարվել միայն դրանց առերեսվելով և մարդկանց պատասխանատվության ենթարկելով՝ առանց դրանք ժխտելու։ Պատմության և ճշմարտության դեմ առերեսումը ոչ միայն անցյալի ցավը մեղմելու, այլև համընդհանուր իրավական նորմերի շրջանակներում ապագայում նմանատիպ տառապանքներ կանխելու պատասխանատվության կատարման մասին է։ Մենք հիշատակում ենք նրանց, ում կորցրել ենք ցեղասպանության ժամանակ և կրկին կոչ ենք անում սկսել անցյալի հետ դեմ առ դեմ կանգնելու և ճշմարտությունը բացահայտելու գործընթաց՝ ապագայի համար, որտեղ գերակշռում են խաղաղությունն ու մարդու իրավունքները»,- ասվում է ասոցիացիայի հայտարարությունում։

2022 թվականի ապրիլի 24-ին Դիարբեքիրի փաստաբանների ասոցիացիայի՝ «Հիշողություն և առերեսում» հայտարարության պատճառով հայց էր ներկայացվել կառույցի նախկին նախագահ Նահիտ Էրենի և խորհրդի 10 անդամների դեմ Թուրքիայի քրեական օրենսգրքի 301-րդ հոդվածի համաձայն։ 2024 թվականի հոկտեմբերի 16-ին Դիարբեքիրի 10-րդ ծանր քրեական դատարանն արդարացրել է ասոցիացիայի ղեկավարներին՝ այն հիմքով, որ չեն բավարարվել Թուրքիայի քրեական օրենսգրքի 301-րդ հոդվածով նկարագրված «հանցագործության իրավական տարրերը»։

Թարգմանությունը՝ Էմմա Չոբանյանի