10.10.2026 | 14:49
Վանաձորում, Հրազդանում, Արարատում և Գյումրիում փոշու պարունակությունը գերազանցել է թույլատրելի սահմանը
ԱՄՆ-ում մեղադրանք են առաջադրել Մադուրոյի ձերբակալությանը մասնակցած զինծառայողին, որը դրա արդյունքի վրա խաղադրույք է կատարել
Քաղաքականություն
24.04.2026 | 17:18
ԱՄՆ-ում զինծառայողին մեղադրանք է առաջադրվել Վենեսուելայի նախագահ Նիկոլաս Մադուրոյի ձերբակալության վրա խաղադրույք կատարելու համար։ Նշվում է, որ գործողության մասին գաղտնի տեղեկատվությունն օգտագործելով՝ նա խաղադրույք է կատարել և, ենթադրաբար, շուրջ 400,000 դոլար վաստակել, հաղորդում է Reuters-ը։
ԱՄՆ Արդարադատության նախարարության տվյալներով՝ բանակի հատուկ նշանակության ջոկատի սերժանտ Գեննոն Քեն Վան Դայքը մասնակցել է Մադուրոյին ձերբակալելու գործողության ծրագրմանն ու հունվարի 3-ին դրա իրականացմանը։ Գործողությանը նախորդող շրջանում նա խաղադրույքներ է կատարել Polymarket հարթակում՝ ենթադրելով, որ ԱՄՆ զորքերը կմտնեն Վենեսուելա, և Մադուրոն կհեռացվի իշխանությունից, գրում է The Insider-ը։
Վան Դայքին մեղադրանք է առաջադրվել անձնական շահի համար գաղտնի տեղեկատվության չարաշահման, պետական ոչ հրապարակային տվյալների գողության, ապրանքային և էլեկտրոնային խարդախության, ինչպես նաև անօրինական ֆինանսական գործարքներ կատարելու համար։
Արդարադատության նախարարությունը նշում է, որ զինծառայողներին գաղտնի տեղեկատվությանը հասանելիություն է տրամադրվում միայն իրենց առաքելությունները կատարելու համար, և նրանց թույլատրված չէ այն օգտագործել անձնական շահույթի համար։
Խաղադրույքների հարթակը հայտարարել է, որ համագործակցել է իշխանությունների հետ և կամավոր հայտնել կասկածելի գործունեության մասին։ Բացի այդ՝ ԱՄՆ ապրանքային ֆյուչերսների առևտրի հանձնաժողովը քաղաքացիական հայց է ներկայացրել Վան Դայքի դեմ։
Թարգմանությունը՝ Էմմա Չոբանյանի
