Գլուխ ենք խոնարհում Հայոց ցեղասպանության զոհերի հիշատակի առջև. Պուտինի ուղերձը

Ռուսաստանի նախագահ Վլադիմիր Պուտինը Հայոց ցեղասպանության 111-րդ տարելիցին նվիրված ուղերձում նշել է, որ անպաշտպան մարդկանց կոտորածի հետևանքները ցույց են տվել կրոնական ատելության, ազգայնականության և այլատյացության հրահրման հետևանքները։

«Այսօր մենք գլուխ ենք խոնարհում 20-րդ դարի ամենասարսափելի ողբերգություններից մեկի՝ Հայոց ցեղասպանության հարյուր հազարավոր զոհերի հիշատակի առջև։ Անպաշտպան, անմեղ մարդկանց դաժան կոտորածը, որոնք սպանվեցին, վիրավորվեցին և վտարվեցին իրենց հայրենի քաղաքներից ու գյուղերից, ցնցել է ամբողջ քաղաքակիրթ աշխարհը, և դրա աղետալի հետևանքները հստակ ցույց տվեցին կրոնական ատելության, ազգայնականության և այլատյացության հրահրման հետևանքները»,- ասվում է ուղերձում։

Պուտինը նշել է, որ Ռուսաստանի դիրքորոշումն այս հարցում միշտ անփոփոխ է եղել, արտացոլվել է Ռուսաստանի, Մեծ Բրիտանիայի և Ֆրանսիայի կողմից 1915 թվականի մայիսին ընդունված համատեղ հռչակագրում, որում հայ ժողովրդի նկատմամբ բռնությունը դատապարտվում է որպես մարդկության և քաղաքակրթության դեմ հանցագործություն, իսկ ավելի ուշ՝ 1995 թվականի ապրիլի 14-ի Պետդումայի հայտարարության մեջ։

«Մենք համոզված ենք, որ էթնիկ պատկանելության հիման վրա մարդկանց զանգվածային ոչնչացման և տեղահանության քաղաքականությունը չի կարող և երբեք չի արդարացվի, միջազգային հանրությունը պետք է միավորի ուժերը՝ ապահովելու, որ նման բարբարոսությունը երբեք և ոչ մի տեղ չկրկնվի»,- ասում է հայտարարության մեջ։

Ընդգծվում է, որ այդ տարիների հալածանքներն ու ճնշումները չբուժված վերք են թողել հայերի բազմաթիվ սերունդների համար, բայց կրած ողբերգությունը միավորել է մարդկանց, ովքեր ցուցաբերել են անսասան նվիրվածություն ավանդույթներին, իմաստությանը և քաջությանը։

«Ես համոզված եմ, որ Հայաստանի որդիներն ու դուստրերը կշարունակեն գնահատել իրենց ազգային ինքնությունը, հազարամյակների մշակույթը, լեզուն, ազատությունը և հոգևոր արժեքները։ Մաղթում եմ բարեկամ հայ ժողովրդին բարեկեցություն, բարգավաճում և ամենայն բարիք»,- ասվում է Պուտինի ուղերձում։

Թարգմանությունը՝ Էմմա Չոբանյանի