Թրամփը հայտարարել է, թե Իրանը չգիտի՝ ով է իր առաջնորդը

ԱՄՆ նախագահ Դոնալդ Թրամփը հիասթափություն է հայտնել Իրանի ղեկավարության նկատմամբ, քանի որ սպասում է պատերազմը դադարեցնելու «միասնական» առաջարկի, գրում է CNN-ը։

«Իրանին շատ դժվար է  հասկանալ, թե ով է իր առաջնորդը։ Նրանք պարզապես չգիտեն։ Ներքին պայքարն ընթանում է «կոշտ գծի» կողմնակիցների, որոնք կորուստներ են կրում մարտադաշտում, և «չափավորների» միջև, որոնք այդքան էլ չափավոր չեն (բայց հարգանք են ձեռք բերում)»,- գրել է Թրամփը Truth Social-ում։

Սպիտակ տան մամուլի քարտուղար Քարոլայն Լիվիթը չորեքշաբթի հայտարարել էր, որ վարչակազմը կարծում է՝ գիտի, թե Իրանի ներսում ով կստորագրի պատերազմը դադարեցնելու վերջնական համաձայնագիրը, նույնիսկ այն դեպքում, երբ ԱՄՆ պաշտոնյաները նկատում են ռեժիմի ներսում առկա ներքին տարաձայնություններ։

Հարցին՝ ինչպե՞ս է վարչակազմը հասկանում վերջնական որոշում կայացնողի դերը, Լիվիթը պատասխանել է, որ Սպիտակ տունը և հետախուզական համայնքը «անշուշտ շատ լավ հասկանում են դա»։

«Այնուամենայնիվ, մենք ուզում ենք տեսնել միասնական պատասխան և միասնական առաջարկ», ասել է նա։

CNN-ը հաղորդել էր, որ ԱՄՆ-ն կասկածում է Իրանի բանակցային թիմի (խորհրդարանի խոսնակ Մոհամմադ Բաղեր Ղալիբաֆի և արտգործնախարար Աբբաս Արաղչիի գլխավորությամբ) և Իրանի Իսլամական հեղափոխության պահապանների կորպուսի միջև պառակտման առկայության մասին։

Բացի այդ, Թրամփը նաև պնդել է, թե ԱՄՆ-ը «լիակատար վերահսկողություն ունի Հորմուզի նեղուցի նկատմամբ»։

«Ոչ մի նավ չի կարող մտնել կամ դուրս գալ՝ առանց Միացյալ Նահանգների ռազմածովային ուժերի թույլտվության։ Այն «ամուր փակ է», մինչև այն պահը, երբ Իրանը կարողանա գործարք կնքել»,- գրել է նա։

Թարգմանությունը՝ Էմմա Չոբանյանի