28.09.2026 | 23:18
Հայաստանի մի շարք հասցեներում էլեկտրաէներգիայի անջատումներ կլինեն
Ծանրամարտի ԵԱ. Անդրանիկ Կարապետյանը` բրոնզե մեդալակիր, Ռաֆիկ Հարությունյանը 7-րդն է
23.04.2026 | 18:09
Հայաստանի ներկայացուցիչ Ռաֆիկ Հարությունյանը (88 կգ) չկարողացավ մեդալ նվաճել ծանրամարտի Եվրոպայի առաջնությունում։
Վրաստանի Բաթումի քաղաքում շարունակվող ԵԱ-ում 25-ամյա ծանրորդը երկամարտում գրանցեց 355 կգ (160+195) արդյունք ու գրավեց 7-րդ տեղը։
88 կգ քաշային կարգի մրցմանը մասնակցեց նաև Հայաստանի հավաքականի նախկին անդամ, այժմ Բոսնիա և Հերցեգովինան ներկայացնող Անդրանիկ Կարապետյանը, որը երկամարտի 361 կգ (167+194) արդյունքով դարձավ բրոնզե մեդալակիր։
Եվրոպայի չեմպիոնի կոչումը նվաճեց մոլդովացի Մարին Ռոբուն, որը երկամարտում գրանցեց 373 կգ (173+200): Արծաթե մեդալակիր դարձավ վրացի Զուրաբ Մսխալաձեն 363 կգ (163+200) արդյունքով:
Հիշեցնենք, որ Ռաֆիկ Հարությունյանը մեդալակիր էր դարձել Եվրոպայի նախորդ չորս առաջնություններում։ 2022-ին նա դարձել էր Եվրոպայի չեմպիոն, 2023-ին ու 2024-ին՝ բրոնզե մեդալակիր, իսկ 2025-ին՝ փոխչեմպիոն։
Եվրոպայի առաջնությունում Հայաստանը երկամարտում ունի 4 մեդալ։ Ավելի վաղ Եվրոպայի փոխչեմպիոն էին դարձել Ալեքսանդրա Գրիգորյանը (58 կգ), Գառնիկ Չոլաքյանը (60 կգ) և Գոռ Սահակյանը (71 կգ), իսկ Մարտին Պողոսյանը (71 կգ) արժանացել էր բրոնզե մեդալի։ Հայաստանի հավաքականը ԵԱ-ին մասնակցում է 16 ծանրորդով՝ 8-ական տղամարդկանց ու կանանց պայքարում։
