ՌԴ-ն եվրոպական երկրներին մեղադրել է, իբր, «Կալինինգրադի գրավմանը նախապատրաստվելու մեջ»

Եվրոպական երկրները Մեծ Բրիտանիայի գլխավորությամբ անցկացվող Միացյալ արշավախմբային ուժերի (JEF) զորավարժությունների ժամանակ  ծովային շրջափակման և Կալինինգրադի մարզի գրավման սցենարներ են մշակում։ Այս մասին հայտարարել է Ռուսաստանի փոխարտգործնախարար Ալեքսանդր Գրուշկոն։ Նրա խոսքով՝ վերջին տարիներին աճել է Հեռավոր Հյուսիսում, Հյուսիսատլանտյան և Բալթիկ ծովում արագ արձագանքման համար պատասխանատու եվրոպական ռազմական ուժերի ակտիվությունը, գրում է The Moscow Times-ը։

Գրուշկոն նաև անդրադարձել է ՆԱՏՕ-ի «Բալթյան պահապան» գործողությունը, որը մեկնարկել էր Բալթիկ ծովի հատակում էներգետիկ և կապի մալուխների կտրումից հետո: Ըստ ռուս պաշտոնյայի՝ դրա իրական նպատակը, իբր, միջազգային տրանսպորտային ուղիների վերահսկողությունն ու բեռնափոխադրումների սահմանափակումն է։

«ՆԱՏՕ-ն միտումնավոր գնում է Եվրոպայի այս հատվածում առճակատման աճի ուղով»,- հայտարարել է Գրուշկոն:

Միացյալ արշավախմբային ուժերը ներառում է Հյուսիսային Եվրոպայի տասը երկիր։ Միացյալ Թագավորությունից բացի՝ դրա մեջ են մտնում Դանիան, Ֆինլանդիան, Էստոնիան, Իսլանդիան, Լատվիան, Լիտվան, Նիդերլանդները, Շվեդիան և Նորվեգիան։ Կոալիցիան ստեղծվել է 2015 թվականին՝ ճգնաժամերին արագ արձագանքելու, սպառնալիքները կանխելու և գործողություններ իրականացնելու համար, հիմնականում Բալթիկ ծովում և Հեռավոր Հյուսիսային տարածաշրջաններում։

Ավելի վաղ Ռուսաստանի նախագահի օգնական Նիկոլայ Պատրուշևն էր խոսել ՆԱՏՕ-ի երկրների կողմից Կալինինգրադի մարզի բռնազավթման ծրագրերի մշակման մասին: Նա զգուշացրել էր, որ Մոսկվան «անհապաղ և ջախջախիչ» պատասխան կձեռնարկի ռուսական մարզի դեմ ցանկացած ռազմական ագրեսիայի:

ԱՄՆ բանակի Եվրոպայի և Աֆրիկայի զորքերի հրամանատար, ՆԱՏՕ-ի ցամաքային զորքերի հրամանատար, գեներալ Քրիստոֆեր Դոնահոն ավելի վաղ հայտարարել էր, որ Հյուսիսատլանտյան դաշինքը ծրագրել է ճնշել ռուսական ուժերի պաշտպանական ներուժը Կալինինգրադի շրջանում: ՆԱՏՕ-ի նախկին հրամանատար Բեն Հոջեսը նույնպես նշել էր, որ դաշինքի ուժերը կարող են ոչնչացնել ռուսական զորքերը և ռազմական ենթակառուցվածքները Կալինինգրադում՝ դաշինքի երկրներից մեկի վրա Ռուսաստանի հարձակման «առաջին ժամերի» ընթացքում:

Թարգմանությունը՝ Էմմա Չոբանյանի