Տուապսեի նավթային տերմինալի հրդեհը երրորդ օրն է՝ շարունակվում է. այն սպառնում է վերածվել բնապահպանական աղետի

Տուապսեի նավթային տերմինալում հրդեհը շարունակվում է արդեն երեք օր՝ աղտոտելով օդը, ծովը և գետը: Բնապահպանները զգուշացնում են թթվային անձրևների և տարածաշրջանի համար երկարաժամկետ հետևանքների մասին, գրում է DW-ի ռուսական ծառայությունը։

Կրասնոդարի երկրամասի օպերատիվ շտաբը խորհուրդ է տվել Տուապսեի բնակիչներին մնալ տանը, փակ պահել պատուհանները: Ռոսպոտրեբնադզորը գրանցել է բենզոլի, քսիլոլի կոնցենտրացիաներ, որոնք գերազանցում են առավելագույն թույլատրելի մակարդակը երկու-երեք անգամ: Այս սահմանափակումները հիմնականում վերաբերում են Գրոզնեֆտի, Սորտիրովկայի և Զվյոզդնի միկրոշրջաններին, ինչպես նաև Կենտրոնական շրջանի որոշ հատվածներին:

Բնապահպան Եվգենի Վիտիշկոն հրդեհն անվանել է «վերջին ժամանակներում տարածաշրջանում տեղի ունեցած ամենամեծ բնապահպանական աղետը», որը կարող է բացասաբար անդրադառնալ շրջակա միջավայրի վրա մի քանի տարի շարունակ: Քիմիկոս Վիլ Միրզայանովն էլ զգուշացրել է, որ այրման հետևանքները պարունակում են պոլիարոմատիկ միացություններ, այդ թվում՝ քաղցկեղածին նյութեր, որոնք վտանգավոր են առողջության համար։

Հրդեհներից առաջացած մշուշը Ստավրոպոլ է հասել նախորդ օրը, իսկ ապրիլի 22-ին, ըստ բնապահպան Գեորգի Կավանոսյանի, այն հասել է Սոչի: Եվս մեկ բնապահպան, որը ցանկացել է անանուն մնալ, զգուշացրել է, որ վնասակար արտանետումների մի մասը կարող է թափվել թթվային անձրևի տեսքով. Տուապսեի բնակիչներն արդեն հայտնել են փողոցներում յուղոտ թաղանթով և սև մասնիկներով տեղումների մասին:

Ապրիլի 20-ին Սև ծովում՝ Տուապսե նավահանգստի մոտ, հայտնաբերվել էր շուրջ 10,000 քառակուսի մետր մակերեսով նավթային հետք։ Իշխանություններն արգելապատնեշներ և վեց նավ են տեղակայել՝ թափված նավթը մաքրելու համար։ Նմանատիպ աշխատանքներ են ընթանում Տուապսե գետի գետաբերանում, որը նույնպես տուժել է նավթի հոսքից։

Թարգմանությունը՝ Էմմա Չոբանյանի